Qala ákimi Murat Áıtenov osy jyldyń basynda bastalǵan Báıdibek bı jáne Arǵynbekov kósheleriniń qıylysyndaǵy jolaıryq qurylys alańynda bolyp, jumystarmen tanysty.
Qaladaǵy kólik qozǵalysyn retteýdiń keshendi josparyna sáıkes, Báıdibek bı dańǵyly men Arǵynbekov kóshesiniń qıylysynda 2022-2023 jyldar aralyǵynda úsh deńgeıli jolaıryqtyń qurylysy júrgiziledi.
Jolaıryqtyń tehnıkalyq sıpatyna sáıkes, Báıdibek bı dańǵylynda 700 metr, Arǵynbekov kóshesinde 921 metr kóshe aralyǵy qurylys aýmaǵyna engen. Qurylys jospary boıynsha eni 80 metrli 4-6 jolaqty avtomagıstral salynyp, jol jıegine jaıaý júrginshiler jáne velojol tóseletin bolady.
Murat Áıtenov atqarylǵan jumystardy kórip, merdiger men sala jetekshisine qurylys jumystarynda kemshilikterdi boldyrmaýdy, sapasyna basa nazar aýdarýdy jáne bólingen qarajatty tıimdi jumsap, belgilengen merzimde aıaqtaýdy tapsyrdy. Sonymen birge, kólik keptelisi sekildi qolaısyzdyqtardy boldyrmaý úshin kóshe qozǵalysyn shekteý jumystaryn durys uıymdastyrýdy aıtty.
Jolaıryq qurylysyna baılanysty Arǵynbekov kóshesinde Báıdibek bı kóshesinen Júsipov kóshesine deıingi aralyqtaǵy kólik qozǵalysyna ýaqytsha shekteý qoıylǵan. 30 qańtar kúni batystan shyǵysqa qaraı Baıtursynov kóshesinen Báıdibek bı dańǵylyna deıingi aralyq jabyldy.
Kólik qozǵalysy úshin Arǵynbekov kóshesine alternatıvti magıstraldar retinde Rysqulov jáne Tólemetov kósheleri belgilengen.
Qazirgi ýaqytta atalmysh qurylys nysanynda Arǵynbekov kóshesi boıymen jer qazý jumystary atqarylýda.
Shymkent qalasy ákimdiginiń baspasóz qyzmeti
