شىمكەنت قالاسىندا بۇقارالىق سپورتتى دامىتۋ ءۇشىن وسى جىلى 54 سپورتتىق الاڭشا قۇرىلىسى سالىنادى. ونىڭ 25-ءى اباي اۋدانىندا، 9-ى ءال-فارابي اۋدانىندا، 10-نى ەڭبەكشى اۋدانىندا سالىنسا، تاعى 10-نى قاراتاۋ اۋدانىندا. بۇل تۋرالى دەنە شىنىقتىرۋ جانە سپورت باسقارماسىنىڭ باسشىسى ب.تۇمانباەۆ قالا اكىمى الدىنداعى ەسەپتى جيىندا ءمالىم ەتتى.
باسقارما باسشىسىنىڭ مالىمەتىنشە، سپورتپەن شۇعىلدانۋشىلار سانىن بيىلعى جىلى 31,99 %-دان 35,9 پايىزعا جەتكىزۋ كوزدەلۋدە. ول ءۇشىن 14 بۇقارالىق سپورتتىق ءىس-شارالار وتكىزىلىپ، سپورتتىق ينفراقۇرىلىمدى دامىتۋ باعىتىندا 6 سپورت نىسانى پايدالانۋعا بەرىلەدى جانە جان باسىنا شاققانداعى قارجىلاندىرۋدى جەتىلدىرۋ بويىنشا وسى جىلى 60 سپورتتىق سەكتسيا اشىلادى. بۇگىندە قالادا 1899 سپورتتىق سەكتسيا جۇمىس جاسايدى.
«دەنە شىنىقتىرۋمەن جانە سپورتپەن اينالىساتىن جالپى حالىقتىڭ سانىن 2025 جىلعا دەيىن 50%-عا، ال ۇلتتىق سپورت تۇرلەرىمەن اينالىساتىن ازاماتتاردىڭ ۇلەسىن 2022 جىلى 3,8% جەتكىزۋ جوسپارلانۋدا. بۇل كورسەتكىشكە جەتۋ ءۇشىن ءتيىستى جۇمىستار اتقارىلاتىن بولادى. سونىمەن بىرگە بيىل 14-18 جاس ارالىعىنداعى 32 647 جاستى، سپورتپەن شۇعىلدانۋعا قارسى كورسەتىلىمى جوق 1810 مۇمكىندىگى شەكتەۋلى ازاماتتى سپورتقا تارتۋ كوزدەلۋدە»،-دەدى ب.تۇمانباەۆ.
ەسەپتى جيىندا سالا جەتەكشىسى شىمكەنت قالاسى سپورتشىلارىنىڭ 2021 جىلعى جەتىستىگىنە دە توقتالىپ ءوتتى.
ونىڭ مالىمەتىنشە، توكيو 2020 ءحححىى جازعى وليمپيادا ويىندارىندا سپورتشىلارىمىز كاراتەدەن 2 قولا مەدالدى ەل قورجىنىنا سالعان. الەم چەمپيوناتىندا جالپى 35 التىن، 26 كۇمىس، 30 قولا مەدال يەمدەنسە، ازيا چەمپيوناتىندا 45 التىن، 32 كۇمىس، 22 قولا مەدال العان. قازاقستان رەسپۋبليكاسىنىڭ چەمپيوناتتارىندا 525 التىن، 390 كۇمىس، 466 قولا مەدالعا قول جەتكىزگەن. سونداي-اق، 2021 جىلى ءار ءتورت جىلدا ءبىر رەت بولاتىن قازاقستان رەسپۋبليكاسىنىڭ V جاستار سپورتتىق ويىندارىندا جالپى كوماندالىق ەسەپتە شىمكەنت قالاسىنىڭ قۇراما كومانداسى 1004 ۇپايمەن 2-ورىندى جەڭىپ العان. حالىقارالىق جانە رەسپۋبليكالىق دەڭگەيدەگى سپورتتىق جارىستاردىڭ جەتىستىكتەرى بويىنشا شىمكەنت قالاسى رەسپۋبليكا بويىنشا كوش باسىندا تۇر.
شىمكەنت قالاسى اكىمدىگىنىڭ ءباسپاسوز قىزمەتى
