Shymkent qalasynda buqaralyq sportty damytý úshin osy jyly 54 sporttyq alańsha qurylysy salynady. Onyń 25-i Abaı aýdanynda, 9-y Ál-Farabı aýdanynda, 10-ny Eńbekshi aýdanynda salynsa, taǵy 10-ny Qarataý aýdanynda. Bul týraly dene shynyqtyrý jáne sport basqarmasynyń basshysy B.Tumanbaev qala ákimi aldyndaǵy esepti jıynda málim etti.
Basqarma basshysynyń málimetinshe, sportpen shuǵyldanýshylar sanyn bıylǵy jyly 31,99 %-dan 35,9 paıyzǵa jetkizý kózdelýde. Ol úshin 14 buqaralyq sporttyq is-sharalar ótkizilip, sporttyq ınfraqurylymdy damytý baǵytynda 6 sport nysany paıdalanýǵa beriledi jáne jan basyna shaqqandaǵy qarjylandyrýdy jetildirý boıynsha osy jyly 60 sporttyq sekııa ashylady. Búginde qalada 1899 sporttyq sekııa jumys jasaıdy.
«Dene shynyqtyrýmen jáne sportpen aınalysatyn jalpy halyqtyń sanyn 2025 jylǵa deıin 50%-ǵa, al ulttyq sport túrlerimen aınalysatyn azamattardyń úlesin 2022 jyly 3,8% jetkizý josparlanýda. Bul kórsetkishke jetý úshin tıisti jumystar atqarylatyn bolady. Sonymen birge bıyl 14-18 jas aralyǵyndaǵy 32 647 jasty, sportpen shuǵyldanýǵa qarsy kórsetilimi joq 1810 múmkindigi shekteýli azamatty sportqa tartý kózdelýde»,-dedi B.Tumanbaev.
Esepti jıynda sala jetekshisi Shymkent qalasy sportshylarynyń 2021 jylǵy jetistigine de toqtalyp ótti.
Onyń málimetinshe, Tokıo 2020 HHHII jazǵy Olımpıada Oıyndarynda sportshylarymyz karateden 2 qola medaldy el qorjynyna salǵan. Álem chempıonatynda jalpy 35 altyn, 26 kúmis, 30 qola medal ıemdense, Azııa chempıonatynda 45 altyn, 32 kúmis, 22 qola medal alǵan. Qazaqstan Respýblıkasynyń chempıonattarynda 525 altyn, 390 kúmis, 466 qola medalǵa qol jetkizgen. Sondaı-aq, 2021 jyly ár tórt jylda bir ret bolatyn Qazaqstan Respýblıkasynyń V Jastar sporttyq oıyndarynda jalpy komandalyq esepte Shymkent qalasynyń qurama komandasy 1004 upaımen 2-oryndy jeńip alǵan. Halyqaralyq jáne respýblıkalyq deńgeıdegi sporttyq jarystardyń jetistikteri boıynsha Shymkent qalasy respýblıka boıynsha kósh basynda tur.
Shymkent qalasy ákimdiginiń baspasóz qyzmeti
