الماتى وبلىسىندا پراۆوسلاۆ حريستياندارىنىڭ زيراتىن بۇزدى دەگەن كۇدىككە ىلىنگەن پسيحيكالىق اۋىتقۋى بار ادام ۇستالدى. بۇعان دەيىن بەلگىسىز بىرەۋلەر ۇشتوبەدەگى پراۆوسلاۆ حريستياندارىنىڭ زيراتىن بۇزعانى تۋرالى حابارلاعان بولاتىن، دەپ جازادى "ادىرنا" ۇلتتىق پورتالى.
ونىڭ ۆيدەوسى الەۋمەتتىك جەلىدە جاريالانىپ، ۆانداليزم قوعامنىڭ اشۋىن تۋدىردى. وعان پرەزيدەنت قاسىم-جومارت توقاەۆ تا ۇن قوستى. مەملەكەت باسشىسىنىڭ تاپسىرماسىمەن ۆانداليزم جاعدايى ىشكى ىستەر مينيسترلىگىنىڭ باقىلاۋىنا الىندى.
Sputnik.kz سايتىنىڭ مالىمدەۋىنشە، بۇگىن الماتى وبلىسىنىڭ پوليتسەيلەرى 34 جاستاعى ەر ادامدى ۇستادى. ول زيراتتاردى بۇزۋعا قاتىسى بار دەگەن كۇدىككە ءىلىندى. ۇشتوبە پوليتسياسىنا جەتكىزىلگەن ەر ادامنىڭ بالا كەزدەن پسيحيكالىق اۋىتقۋى بار بولىپ شىقتى. ونىڭ ىسكە قاتىستىلىعى ساراپتاما جانە كۋاگەرلەر ارقىلى انىقتالدى.
- ۆانداليزم ارەكەتى 16 قاڭتاردا ورىن العانى بەلگىلى بولدى. 14 زيراتقا زالال كەلتىرىلگەن. ولاردىڭ قورشاۋلارى سىندىرىلىپ، كرەستتەرى مەن قابىر باسىنداعى جازۋلارى جۇلىنعان. ۇرلاۋ فاكتىسى تىركەلگەن جوق. زيراتى قيراتىلعانداردىڭ تۋىستارىنا حابار بەرىلدى، - دەلىنگەن حابارلامادا.
قازىرگى كۇنى كۇدىكتىنى پسيحونەۆرولوگيالىق ديسپانسەرگە ورنالاستىرۋ ماسەلەسى شەشىلىپ جاتىر. كۇدىكتىنىڭ اناسى ۇلىنىڭ ارەكەتى ءۇشىن كەشىرىم سۇراپ، ۆيدەو جاريالادى.
"ادىرنا" ۇلتتىق پورتالى
