قازاقستاندا ءبىر ميلليونعا جۋىق بالا وتە كەدەي وتباسىندا تاربيەلەنۋدە. ۇكىمەت وتىرىك ستاتيستيكاسى ارقىلى ولارعا كومەك كورسەتۋگە مۇمكىندىك جاسامايدى دەيدى سەناتورلار. بۇل تۋرالى “ادىرنا” ۇلتتىق پورتالى حابارلايدى.
"قازاقستاندا كەدەيشىلىك جوق" دەگەن ۇراندى تۋ ەتكەن جەرگىلىكتى ورگاندار مەملەكەتتىڭ ولارعا كومەك بەرۋىنە مۇمكىندىك جاسار ەمەس. جوعارى پالاتا وكىلدەرى جۇمىسسىزدىق پەن كەدەيشىلىك دەڭگەيىن ۇنەمى تومەن كورسەتىپ، ۇپاي جيناۋعا تىرىسادى دەپ رەنجۋلى.
رەسمي اقپاراتقا سەنسەك، 2021 جىلى ەلدە 450 مىڭ ادام جۇمىسسىز بولعان. ياعني كەدەيشىلىك دەڭگەيى ءتورت جارىم پايىزدان اسپايدى. ال شىنتۋايتىندا، قازىر ەكى ميلليون ازاماتتىڭ تۇراقتى جۇمىسى، نە اي سايىن الاتىن ايلىعى جوق، دەپ حابارلادى كتك.
ەلدىڭ الەۋمەتتىك الەۋەتىن تەك جاقسى سانمەن ورنەكتەيتىن قازاقستاننىڭ وپتيميستىك تاسىلىنە مۇرات باحتيارۇلى اڭ-تاڭ.
"ەلدەگى وسى كەزگە دەيىنگى كەدەيشىلىك دەڭگەيىن انىقتاۋدا قازاقستاندىق ءتاسىل كەدەيلىكتى تومەندەتىپ كورسەتىپ كەلەدى. كەدەيلىك شەگىن ولشەيتىن الەمدىك ستاندارتتارعا شىعۋعا نە كەدەرگى بولىپ وتىر؟ دەرەكتەرگە سۇيەنسەك، 1 ميلليونعا جۋىق بالالار ەڭ كەدەي وتباسىلاردا تۇرىپ جاتىر. ۇكىمەت ءبىرىنشى كەزەكتە كەدەيشىلىكپەن كۇرەسۋدىڭ جاڭا جۇيەسىن جاساۋ كەرەك", - دەيدى سەنات دەپۋتاتى مۇرات باحتيارۇلى.
ونىڭ پىكىرىنشە، كەلەشەكتە جالعان ستاتيستيكادان تولىققاندى ارىلۋ قاجەت. ءتاتتى وتىرىكتەن اششى شىندىق اناعۇرلىم جاقسى، دەيدى ول.
”ادىرنا” ۇلتتىق پورتالى
