اقوردادا مەملەكەت باسشىسىنىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى. وندا قاۋىپسىزدىك كەڭەسىنىڭ توراعاسى قاسىم-جومارت توقاەۆ قازىرگى ۋاقىتتا ەلدەگى احۋال تولىعىمەن تۇراقتالعانىن جانە قۇقىقتىق ءتارتىپ قايتا قالپىنا كەلگەنىن اتاپ ءوتتى، دەپ حابارلايدى "ادىرنا" ۇلتتىق پورتالى "akorda.kz"-كە سىلتەمە جاساپ.
تۇلعالاردىڭ، قوعام مەن مەملەكەتتىڭ قورعالۋ دەڭگەيىن ارتتىرۋ ءۇشىن بارلىق شارا قابىلدانىپ جاتىر.
پرەزيدەنت بارلىق مەملەكەتتىك ورگاندار وتكەن وقيعادان ساباق الۋعا ءتيىس ەكەنىن ايتتى. جاڭعىرتىلعان ۇلتتىق قاۋىپسىزدىك جۇيەسى سىن-قاتەردىڭ كەز كەلگەن قيىندىعىنا توتەپ بەرۋگە دايىن بولۋى قاجەت.
– بۇدان بىلاي قىلمىستىق توپتار مەن تەرروريستەر قالالارىمىزدى باسىپ الىپ، ازاماتتار مەن ولاردىڭ وتباسىلارىنىڭ بەيبىت ومىرىنە قول سۇعىپ، مەملەكەتتىلىگىمىزگە قاۋىپ توندىرمەۋى ءۇشىن شارالار قابىلداۋعا مىندەتتىمىز. ۇلتتىق قاۋىپسىزدىك جۇيەسىن قايتا قۇرۋ ءىسىنىڭ ماقساتى دا وسى، – دەدى قاسىم-جومارت توقاەۆ.
قاۋىپسىزدىك كەڭەسىنىڭ باسشىسى قاۋىپسىزدىككە جاۋاپ بەرەتىن بارلىق قۇرىلىمنىڭ ءوز جۇمىستارىن وزگەرتۋى كەرەك ەكەنىن اتاپ ءوتتى. بۇل رەتتە، ولاردىڭ ءوزارا ءىس-قيمىلدارى بارىنشا تەڭگەرىمدى بولۋعا ءتيىس.
مەملەكەت باسشىسى ۇلتتىق قاۋىپسىزدىكتىڭ بارلىق باعىتىن نىعايتۋ جونىندەگى ناقتى شارالاردى كەشىكتىرمەي جۇزەگە اسىرۋعا كىرىسۋدى تاپسىردى. قاۋىپسىزدىك كەڭەسى وتىرىسىنىڭ بارىسىندا ۇلتتىق قاۋىپسىزدىك جۇيەسىن رەفورمالاۋعا باعىتتالعان ناقتى شەشىمدەر قابىلداندى.
"ادىرنا" ۇلتتىق پورتالى.
