Aqordada Memleket basshysynyń tóraǵalyǵymen Qaýipsizdik Keńesiniń otyrysy ótti. Onda Qaýipsizdik Keńesiniń Tóraǵasy Qasym-Jomart Toqaev qazirgi ýaqytta eldegi ahýal tolyǵymen turaqtalǵanyn jáne quqyqtyq tártip qaıta qalpyna kelgenin atap ótti, dep habarlaıdy "Adyrna" ulttyq portaly "akorda.kz"-ke silteme jasap.
Tulǵalardyń, qoǵam men memlekettiń qorǵalý deńgeıin arttyrý úshin barlyq shara qabyldanyp jatyr.
Prezıdent barlyq memlekettik organdar ótken oqıǵadan sabaq alýǵa tıis ekenin aıtty. Jańǵyrtylǵan ulttyq qaýipsizdik júıesi syn-qaterdiń kez kelgen qıyndyǵyna tótep berýge daıyn bolýy qajet.
– Budan bylaı qylmystyq toptar men terrorıster qalalarymyzdy basyp alyp, azamattar men olardyń otbasylarynyń beıbit ómirine qol suǵyp, memlekettiligimizge qaýip tóndirmeýi úshin sharalar qabyldaýǵa mindettimiz. Ulttyq qaýipsizdik júıesin qaıta qurý isiniń maqsaty da osy, – dedi Qasym-Jomart Toqaev.
Qaýipsizdik Keńesiniń basshysy qaýipsizdikke jaýap beretin barlyq qurylymnyń óz jumystaryn ózgertýi kerek ekenin atap ótti. Bul rette, olardyń ózara is-qımyldary barynsha teńgerimdi bolýǵa tıis.
Memleket basshysy ulttyq qaýipsizdiktiń barlyq baǵytyn nyǵaıtý jónindegi naqty sharalardy keshiktirmeı júzege asyrýǵa kirisýdi tapsyrdy. Qaýipsizdik Keńesi otyrysynyń barysynda ulttyq qaýipsizdik júıesin reformalaýǵa baǵyttalǵan naqty sheshimder qabyldandy.
"Adyrna" ulttyq portaly.
