نازارباەۆ اۋلەتى الماتىنى دا يەلەنگەن بە؟

"2001 جىلى الماتىنىڭ "الما-اراسان" شاتقالىنا قاراي كوتەرىلەتىن جولدىڭ وڭ قاپتالىنداعى 61 گەكتار جەرگە ساياباق اشۋ تۋرالى شەشىم قابىلداندى. جاڭا ساياباق اۋەلى "21 عاسىر" دەپ اتالۋى كەرەك ەدى. بىراق ول يدەيا جۇزەگە اسپادى. ول جەر قازىر "قازاقستان رەسپۋبليكاسى تۇڭعىش پرەزيدەنتىنىڭ ساياباعى" دەپ اتالادى.

نازارباەۆتىڭ قۇرمەتىنە اشىلعان كەڭ ساياباق ىشىندە وسىلايشا ونىڭ ەسكەرتكىشى بوي كوتەردى. بىراق ساياباقتىڭ اشىلۋى ونىڭ شەكاراسى بىتكەن تۇستان باستالاتىن 135 گەكتار جەردىڭ ەكس-پرەزيدەنتتىڭ وتباسى مۇشەلەرى مەن وعان جاقىن ادامداردىڭ مەنشىگىنە ءوتىپ كەتكەنىن جاسىرىپ قالعانداي", — دەپ جازىلعان زەرتتەۋدە.

سونىمەن ەڭ ءبىرىنشى جەر تەلىمى مەن ونداعى سارايلار نۇرسۇلتان نازارباەۆتىڭ ورتانشى قىزى دينارا قۇلىباەۆانىڭ مەنشىگىندە بولىپ شىقتى. نىڭ اۋماعى – 74 149 شارشى مەتر، ياعني، 7,5 گەكتارعا جۋىق. بۇل جەر – "جايلاۋ" گولف-كلۋبى مەن قازاقستان پرەزيدەنتى ءىس باسقارماسىنا قارايتىن "وقجەتپەس" ءساناتوريى اۋماعىمەن شەكتەسىپ جاتىر.

كەلەسى جەر – "جايلاۋ" ىقشاماۋدانى، 2-ءۇي. 2,8 گەكتار جەر پرەزيدەنتتىڭ كىشى قىزى ءاليا نازارباەۆا مەن كۇيەۋ بالاسى ديماش دوسانوۆتىڭ مەنشىگىندە. بۇل جەر قازىر قاراۋسىز تۇر. ۋچاسكەدە بۇرىن قىزىل شاتىرلى ءۇي تۇرعان. ونى 2019 جىلى بۇزىپ تاستاعان. ازىرگە ورنىنا ەشتەڭە سالماعان.

دينارا مەن ءاليانىڭ كورشىسى – كەلەسى جەردىڭ يەسى كىم بولۋى مۇمكىن؟ بۇل، ارينە ريتوريكالىق ساۋال. ءاليانىڭ ۋچاسكەسىنىڭ ەكى قاپتالىن قورشاپ تۇرعان ءتورت جەر تەلىمى نازارباەۆتىڭ ۇلكەن قىزى، ءماجىلىس دەپۋتاتى داريعا نازارباەۆانىكى. ناقتىراق ايتساق، ءتورت ۋچاسكەنىڭ ۇشەۋى ناقتى ءوزىنىڭ اتىنا تىركەلگەن. ءۇش جەر تەلىمىنىڭ اۋماعى التى جارىم گەكتارعا جۋىقتايدى. ونىڭ بىرىندە سۇر شاتىرلى كوتتەدج تۇر. ءۇي ەرتەرەكتە سالىنعان.

ەكىنشى جەردە ءزاۋلىم ساراي سالىنىپ جاتىر. ونىڭ قۇرىلىسى 2018 جىلى باستالعان. اۋماعى شامامەن 2350 شارشى مەتر. عيماراتتىڭ ارلەۋ، بەزەندىرۋ جۇمىستارى عانا قالعان. سارايدىڭ ىشكى جۇمىستارى اياقتالعان با، بىزگە ول جاعى بەلگىسىز.

ال ءۇي سالۋعا ارنالعان، بىراق ازىرگە ەشتەڭە سالىنباعان 2,4 گەكتارعا جۋىق جەر DLS group دەگەن كومپانياعا قارايدى. بىرنەشە جىل بۇرىنعى دەرەكتە داريعا نازارباەۆا وسى كومپانيانىڭ جالعىز قۇرىلتايشىسى بولعان. سەرگەي رىچكوۆ دەگەن ادام قازىر دە ديرەكتور بولىپ وتىر، دەمەك، كومپانيا قۇرىلتايشىسى دا اۋىسپاۋى ابدەن مۇمكىن.

ءاليا، دينارا، داريعا نازارباەۆلاردىڭ جەرلەرىمەن شەكارالاس تۇرعان كەلەسى تەلىمنىڭ اۋماعى 13 گەكتارعا جۋىقتايدى. جەر كاداستارى جۇيەسىندە ونىڭ جارتىسى عانا كورسەتىلگەن. بۇل اۋماق قازاقستاننىڭ ەكس-پرەزيدەنتى نۇرسۇلتان نازارباەۆتىڭ مەنشىگىندە. ءۇيدىڭ اينالاسى قالىڭ اعاش. جاساندى كولشىگى، تەننيس كورتى بار.