Qazaqstannyń eks-Prezıdenti Nursultan Nazarbaevtyń, qyzdary – Álııa, Dınara, Darıǵa Nazarbaevalardyń, sondaı-aq inisi Qaırat Satybaldynyń Almatynyń Bostandyq aýdanynda záýlim úıleri bary anyqtaldy dep habarlaıdy "Adyrna" ulttyq portaly.
Bul týraly "azattyq.org" saıty keń kólemde zertteý jasady.
"2001 jyly Almatynyń "Alma-Arasan" shatqalyna qaraı kóteriletin joldyń oń qaptalyndaǵy 61 gektar jerge saıabaq ashý týraly sheshim qabyldandy. Jańa saıabaq áýeli "21 ǵasyr" dep atalýy kerek edi. Biraq ol ıdeıa júzege aspady. Ol jer qazir "Qazaqstan Respýblıkasy tuńǵysh prezıdentiniń saıabaǵy" dep atalady.
Nazarbaevtyń qurmetine ashylǵan keń saıabaq ishinde osylaısha onyń eskertkishi boı kóterdi. Biraq saıabaqtyń ashylýy onyń shekarasy bitken tustan bastalatyn 135 gektar jerdiń eks-prezıdenttiń otbasy músheleri men oǵan jaqyn adamdardyń menshigine ótip ketkenin jasyryp qalǵandaı", — dep jazylǵan zertteýde.
Sonymen eń birinshi jer telimi men ondaǵy saraılar Nursultan Nazarbaevtyń ortanshy qyzy Dınara Qulybaevanyń menshiginde bolyp shyqty. nyń aýmaǵy – 74 149 sharshy metr, ıaǵnı, 7,5 gektarǵa jýyq. Bul jer – "Jaılaý" golf-klýby men Qazaqstan prezıdenti is basqarmasyna qaraıtyn "Oqjetpes" sanatorııi aýmaǵymen shektesip jatyr.
Kelesi jer – "Jaılaý" yqshamaýdany, 2-úı. 2,8 gektar jer prezıdenttiń kishi qyzy Álııa Nazarbaeva men kúıeý balasy Dımash Dosanovtyń menshiginde. Bul jer qazir qaraýsyz tur. Ýchaskede buryn qyzyl shatyrly úı turǵan. Ony 2019 jyly buzyp tastaǵan. Ázirge ornyna eshteńe salmaǵan.
Dınara men Álııanyń kórshisi – kelesi jerdiń ıesi kim bolýy múmkin? Bul, árıne rıtorıkalyq saýal. Álııanyń ýchaskesiniń eki qaptalyn qorshap turǵan tórt jer telimi Nazarbaevtyń úlken qyzy, májilis depýtaty Darıǵa Nazarbaevaniki. Naqtyraq aıtsaq, tórt ýchaskeniń úsheýi naqty óziniń atyna tirkelgen. Úsh jer teliminiń aýmaǵy alty jarym gektarǵa jýyqtaıdy. Onyń birinde sur shatyrly kottedj tur. Úı erterekte salynǵan.
Ekinshi jerde záýlim saraı salynyp jatyr. Onyń qurylysy 2018 jyly bastalǵan. Aýmaǵy shamamen 2350 sharshy metr. Ǵımarattyń árleý, bezendirý jumystary ǵana qalǵan. Saraıdyń ishki jumystary aıaqtalǵan ba, bizge ol jaǵy belgisiz.
Al úı salýǵa arnalǵan, biraq ázirge eshteńe salynbaǵan 2,4 gektarǵa jýyq jer DLS group degen kompanııaǵa qaraıdy. Birneshe jyl burynǵy derekte Darıǵa Nazarbaeva osy kompanııanyń jalǵyz quryltaıshysy bolǵan. Sergeı Rychkov degen adam qazir de dırektor bolyp otyr, demek, kompanııa quryltaıshysy da aýyspaýy ábden múmkin.
Álııa, Dınara, Darıǵa Nazarbaevlardyń jerlerimen shekaralas turǵan kelesi telimniń aýmaǵy 13 gektarǵa jýyqtaıdy. Jer kadastary júıesinde onyń jartysy ǵana kórsetilgen. Bul aýmaq Qazaqstannyń eks-prezıdenti Nursultan Nazarbaevtyń menshiginde. Úıdiń aınalasy qalyń aǵash. Jasandy kólshigi, tennıs korty bar.
"Adyrna" ulttyq portaly.
