شىمكەنت قالاسىندا اۋىل شارۋاشىلىعى سالاسىنا مەملەكەتتىك قولداۋ كورسەتۋگە بيۋدجەتتەن 1 ميلليارد 49 ميلليون تەڭگە قارجى بولىنگەن.
بۇل تۋرالى شىمكەنت قالاسى اكىمدىگىنىڭ اۋىل شارۋاشىلىعى جانە ۆەتەريناريا باسقارماسى اگروونەركاسىپ كەشەنىن دامىتۋ ءبولىمىنىڭ باسشىسى جانىبەك توعاي مالىمدەدى.
—شىمكەنتتە 60 مىڭ گەكتار اۋىل شارۋاشىلىعى جەرى بار. ونىڭ 20 مىڭ گەكتارى جايىلىمدىق جەر. قازىر قالا اۋماعىندا 70 مىڭ باسقا جۋىق ءىرى قارا بار. مەملەكەت مال باسىن اسىلداندىرۋعا باسىمدىق بەرىپ وتىرمىز. ەگەر فەرمەر اسىل تۇقىمدى مال ساتىپ السا، ءىرى قارانىڭ ءاربىر باسىنا 400 مىڭ تەڭگەگە دەيىن سۋبسيديا بەرىلەدى. جالپى، اۋىل شارۋاشىلىعى سالاسىنا مەملەكەتتىك قولداۋ كورسەتۋگە بيۋدجەتتەن 1 ميلليارد 49 ميلليون تەڭگە بولىنسە، ونىڭ ىشىندە مال ازىعىن سۋبسيديالاۋعا 248 ميلليون تەڭگە جۇمسالماق، – دەدى ج.توعاي.
ونىڭ ايتۋىنشا، قۋاڭشىلىققا بايلانىستى جەم-شوپكە ارناپ تا سۋبسيديا تولەنەدى. ماسەلەن، بيىل ونىڭ مولشەرى اسىل تۇقىمدى ءىرى قارانىڭ انالىعىنا جىلىنا 70 مىڭ تەڭگەنى قۇرايدى. ەگەر سيىر ارالاس تۇقىمدى بولسا، 50 مىڭ تەڭگە، شارۋا مال بولسا، 30 مىڭ تەڭگە تولەنەدى. جىلقىدا ءار ساۋىن بيەگە 30 مىڭ تەڭگە، انالىق قويدىڭ ءار باسىنا 8 مىڭ تەڭگە سۋبسيديا بەرىلەدى. دەگەنمەن، مۇنداي كومەككە قول جەتكىزۋ ءۇشىن جىلقى مەن ءىرى قارانىڭ 50 باستان، قوي 300 باستان كەم بولماۋى ءتيىس.
مەملەكەتتىڭ وسىنداي كومەگىنىڭ شاراپاتىن كورىپ، شارۋاسىن دوڭگەلەتىپ وتىرعانداردىڭ ءبىرى كارىمجان ەگەمنازاروۆ. العاش رەت وسىدان 3 جىل بۇرىن نيمدەرلاندىدان گولشتين تۇقىمدى 35 باس بۇزاۋلى سيىر اكەلگەن شارۋاشىلىقتا بۇگىندە 220 باس ءىرى قارا بار. ونىڭ ىشىندە 140 باسى ساۋىن سيىر ەكەن.
–زاماناۋي تالاپتارعا ساي قوراجاي سالىپ جاتىرمىز. قۇرىلىس جۇمىستارى اياقتالۋعا تاياۋ. گولشتين تۇقىمىنىڭ ارتىقشىلىعى ونىڭ ءسۇتتى مول بەرۋىندە. بەلگىلەنگەن راتسيونمەن قۇراما جەم بەرىپ وتىرامىز. ناتيجەسىندە ءار باسى تاۋلىگىنە 24-28 ليتر ارالىعىندا ءسۇت بەرەدى. ياعني، ءار سيىر جىلىنا 7 توننادان استام ءسۇت بەرەدى. قازىر تاۋلىگىنە 3 تونناعا جۋىق ءسۇت ساۋىپ الىپ وتىرمىز، – دەيدى ك.ەگەمنازاروۆ.
ازىرگە شارۋاشىلىق ءسۇتتى جەرگىلىكتى ءسۇت ونىمدەرىن شىعاراتىن كاسىپورىندارعا وتكىزىپ وتىر. وتكىزىلگەن ءسۇتتىڭ ءار ليترىنە 20 تەڭگەدەن قوسىمشا سۋبسيديا الادى ەكەن. كاسىپكەر فەرمانىڭ قۇرىلىسى اياقتالعان سوڭ مال باسىن كوبەيتۋدى، ءسويتىپ بىرتىندەپ شاعىن ءسۇت وڭدەۋ زاۋىتىن اشۋدى كوزدەپ وتىر ەكەن.
«شىمكەنت كەلبەتى» – ايدار قۇلجانوۆ،
فوتو سەرىك قوساەۆ.
