Shymkent qalasynda aýyl sharýashylyǵy salasyna memlekettik qoldaý kórsetýge bıýdjetten 1 mıllıard 49 mıllıon teńge qarjy bólingen.
Bul týraly Shymkent qalasy ákimdiginiń aýyl sharýashylyǵy jáne veterınarııa basqarmasy agroónerkásip keshenin damytý bóliminiń basshysy Jánibek Toǵaı málimdedi.
—Shymkentte 60 myń gektar aýyl sharýashylyǵy jeri bar. Onyń 20 myń gektary jaıylymdyq jer. Qazir qala aýmaǵynda 70 myń basqa jýyq iri qara bar. Memleket mal basyn asyldandyrýǵa basymdyq berip otyrmyz. Eger fermer asyl tuqymdy mal satyp alsa, iri qaranyń árbir basyna 400 myń teńgege deıin sýbsıdııa beriledi. Jalpy, aýyl sharýashylyǵy salasyna memlekettik qoldaý kórsetýge bıýdjetten 1 mıllıard 49 mıllıon teńge bólinse, onyń ishinde mal azyǵyn sýbsıdııalaýǵa 248 mıllıon teńge jumsalmaq, – dedi J.Toǵaı.
Onyń aıtýynsha, qýańshylyqqa baılanysty jem-shópke arnap ta sýbsıdııa tólenedi. Máselen, bıyl onyń mólsheri asyl tuqymdy iri qaranyń analyǵyna jylyna 70 myń teńgeni quraıdy. Eger sıyr aralas tuqymdy bolsa, 50 myń teńge, sharýa mal bolsa, 30 myń teńge tólenedi. Jylqyda ár saýyn bıege 30 myń teńge, analyq qoıdyń ár basyna 8 myń teńge sýbsıdııa beriledi. Degenmen, mundaı kómekke qol jetkizý úshin jylqy men iri qaranyń 50 bastan, qoı 300 bastan kem bolmaýy tıis.
Memlekettiń osyndaı kómeginiń sharapatyn kórip, sharýasyn dóńgeletip otyrǵandardyń biri Kárimjan Egemnazarov. Alǵash ret osydan 3 jyl buryn Nımderlandydan golshtın tuqymdy 35 bas buzaýly sıyr ákelgen sharýashylyqta búginde 220 bas iri qara bar. Onyń ishinde 140 basy saýyn sıyr eken.
–Zamanaýı talaptarǵa saı qorajaı salyp jatyrmyz. Qurylys jumystary aıaqtalýǵa taıaý. Golshtın tuqymynyń artyqshylyǵy onyń sútti mol berýinde. Belgilengen raıonmen qurama jem berip otyramyz. Nátıjesinde ár basy táýligine 24-28 lıtr aralyǵynda sút beredi. Iaǵnı, ár sıyr jylyna 7 tonnadan astam sút beredi. Qazir táýligine 3 tonnaǵa jýyq sút saýyp alyp otyrmyz, – deıdi K.Egemnazarov.
Ázirge sharýashylyq sútti jergilikti sút ónimderin shyǵaratyn kásiporyndarǵa ótkizip otyr. Ótkizilgen súttiń ár lıtrine 20 teńgeden qosymsha sýbsıdııa alady eken. Kásipker fermanyń qurylysy aıaqtalǵan soń mal basyn kóbeıtýdi, sóıtip birtindep shaǵyn sút óńdeý zaýytyn ashýdy kózdep otyr eken.
«Shymkent kelbeti» – Aıdar QULJANOV,
Foto Serik QOSAEV.
