ءماجىلىس دەپۋتاتى ەلنۇر بەيسەنباەۆ پالاتانىڭ جالپى وتىرىسىندا ۇلتتىق ستاتيستيكا بيۋروسىنىڭ جالعان مالىمەت تاراتاتىنىن ايتتى، دەپ حابارلايدى «ادىرنا» ءتىلشىسى.
«ۇكىمەتتىڭ شەشىم قابىلداۋداعى كەمشىلىكتەرىنىڭ ءبىرى – جالعان جانە ءدال ەمەس ستاتيستيكانى قولدانۋ. ستاتيستەر تامىز-قىركۇيەك ايلارىندا كارتوپتىڭ ءۇش ەسە قىمباتتاعانى تۋرالى ەستىمەگەن سياقتى. ال كەيبىر قۇرىلىس ماتەريالدارى 2,5 ەسە قىمباتتادى جانە ولاردىڭ باعاسى وسى كۇنگە دەيىن سول دەڭگەيدە قالدى. سونىمەن بىرگە، ساۋدا مينيسترلىگى باعانىڭ جالپى ءوسۋى 12% - دان اسپاعانىن ايتتى. بۇل دەرەكتەردىڭ ەشقايسىسىن ۇلتتىق ستاتيستيكا بيۋروسى جوققا شىعارعان جوق»،– دەدى ول.
دەپۋتات جالاقى ماسەلەسى بويىنشا دا وسىنداي جاعداي بار ەكەنىن اتاپ ءوتتى. ماسەلەن، ۇلتتىق ستاتيستيكا بيۋروسى ەلدەگى ورتاشا جالاقى 257 مىڭ تەڭگەنى، ال حالىقتىڭ جان باسىنا شاققانداعى اتاۋلى تابىسى شامامەن 131 مىڭ تەڭگەنى قۇرايدى دەپ حابارلاعان.
بەيسەنباەۆتىڭ ايتۋىنشا، قاراپايىم ازاماتتاردى ايتپاعاندا، ستاتيستتەردىڭ وزدەرى بۇل ساندارعا سەنبەيدى.
رەسمي دەرەكتەر بويىنشا، 2021 جىلى قازاقستانداعى جۇمىسسىزدار سانى 4,9%-دى، ياعني شامامەن 451 مىڭ ادامدى قۇراعان.
«2021 جىلدىڭ قاراشا ايىندا ءبىز ەلدەگى جۇمىسسىزدار سانى الدەقايدا جوعارى ەكەنىن، ال جاستار اراسىنداعى جۇمىسسىزدىق دەڭگەيى ويدان شىعارىلعان كورسەتكىشتەرمەن جاسىرىلعانىن اتاپ وتتىك. سول جىلدىڭ باسىندا كورەيادا زاڭسىز جۇمىس ىستەيتىن 12 مىڭ قازاقستاندىق تۋرالى ايتتىق. ۇكىمەت تاراپىنان «ءبىز ەسكەرەمىز، كورەمىز، جاسايمىز» دەگەن سوزدەر عانا ايتىلدى»، - دەدى ول.
«ادىرنا» ۇلتتىق پورتالى
