Úkimet jalǵan jáne dál emes statıstıkany qoldanady – depýtat

9181
Adyrna.kz Telegram

Májilis depýtaty Elnur Beısenbaev palatanyń jalpy otyrysynda Ulttyq statıstıka bıýrosynyń jalǵan málimet taratatynyn aıtty, dep habarlaıdy «Adyrna» tilshisi.

«Úkimettiń sheshim qabyldaýdaǵy kemshilikteriniń biri – jalǵan jáne dál emes statıstıkany qoldaný. Statıster tamyz-qyrkúıek aılarynda kartoptyń úsh ese qymbattaǵany týraly estimegen sııaqty. Al keıbir qurylys materıaldary 2,5 ese qymbattady jáne olardyń baǵasy osy kúnge deıin sol deńgeıde qaldy. Sonymen birge, saýda mınıstrligi baǵanyń jalpy ósýi 12% - dan aspaǵanyn aıtty. Bul derekterdiń eshqaısysyn Ulttyq statıstıka bıýrosy joqqa shyǵarǵan joq»,– dedi ol.

Depýtat jalaqy máselesi boıynsha da osyndaı jaǵdaı bar ekenin atap ótti. Máselen, Ulttyq statıstıka bıýrosy eldegi ortasha jalaqy 257 myń teńgeni, al halyqtyń jan basyna shaqqandaǵy ataýly tabysy shamamen 131 myń teńgeni quraıdy dep habarlaǵan.

Beısenbaevtyń aıtýynsha, qarapaıym azamattardy aıtpaǵanda, statıstterdiń ózderi bul sandarǵa senbeıdi.

Resmı derekter boıynsha, 2021 jyly Qazaqstandaǵy jumyssyzdar sany 4,9%-dy, ıaǵnı shamamen 451 myń adamdy quraǵan.

«2021 jyldyń qarasha aıynda biz eldegi jumyssyzdar sany áldeqaıda joǵary ekenin, al jastar arasyndaǵy jumyssyzdyq deńgeıi oıdan shyǵarylǵan kórsetkishtermen jasyrylǵanyn atap óttik. Sol jyldyń basynda Koreıada zańsyz jumys isteıtin 12 myń qazaqstandyq týraly aıttyq. Úkimet tarapynan «biz eskeremiz, kóremiz, jasaımyz» degen sózder ǵana aıtyldy», - dedi ol.

«Adyrna» ulttyq portaly

Pikirler