ون كۇننەن سوڭ بەيجىڭدە XXIV قىسقى وليمپيادا ويىندارىنىڭ جالاۋى جەلبىرەيدى. الەمدىك جارىستا قىسقى سپورتتان ۇلتتىق قۇراما ساپىندا شىمكەنتتىڭ نامىسىن قورعاۋعا شەرزود حاشيرباەۆ اتتانادى. اتالعان دودادا شىمكەنتتىك اتلەت فريستايل-اكروباتيكادان سىنعا تۇسەدى. بۇل تۋرالى قالالىق دەنە شىنىقتىرۋ جانە سپورت باسقارماسىنىڭ باسشىسى باۋىرجان تۇمانباەۆ مالىمدەدى.
– 4-20 اقپان كۇندەرى قىتايدا وتەتىن سپورتتىق دوداعا قالامىزدان ءبىر سپورتىشى ليتسەنزياعا يە بولىپ وتىر. 19 جاستاعى شەرزود حاشيرباەۆ فينليانديادا وتكەن الەم كۋبوگىندە ءتورتىنشى ورىندى جەڭىپ، وليمپيادا جولداماسىن الدى. شەرزود بولاشاعىنان ءۇمىت كۇتتىرەتىن سپورتشىلارىمىزدىڭ ءبىرى. ول قازاقستاننىڭ بىرنەشە دۇركىن جەڭىمپازى، الەم كۋبوكتارىنىڭ بەلگىلى كەزەڭدەرىنەن ءوتىپ جۇلدەگەر اتاندى.سسپورتشىمىز الماتىدا ۇلتتىق قۇراما سپورتشىلارىمەن الەمدىك دوداداعا دايىندىق ۇستىندە. قازىر وليمپياداعا باراتىن سپورتشىلارىمىز كارانتينگە وقشاۋلانىپ، دايىندىقتىڭ سوڭعى كەزەڭىنەن ءوتىپ جاتىر. ولار 27 قاڭتاردا قىتايعا اتتانادى. ال پەكين قالاسىندا 10 اقپاندا فريستايلدان جارىستار باستالادى دەپ جوسپارلانعان. شەرزود 16 اقپاندا ونەر كورسەتەدى دەپ كۇتىلۋدە. جاس بولسا دا، ۇلكەن ءۇمىت كۇتەمىز، - دەيدى باۋىرجان قالمۇحامەدۇلى.
باسقارما باسشىسىنىڭ ايتۋىنشا، شىمكەنتتە قىسقى سپورت تۇرلەرى دامىپ كەلە جاتىر. قالادا قىسقى وليمپيادا رەزەرۆىن دايىندايتىن ارنايى سپورت مەكتەبى بار. مۇز سارايىندا ورنالاسقان مەكتەپتە سپورتتىڭ ءتورت تۇرىنەن جاتتىعۋ جۇمىستارى جۇرگىزىلەدى. اتاپ ايتساق، شايبالى حوككەي، شورت-ترەك، فريستايل جانە مانەرلەپ سىرعاناۋدان اتلەتتەر دايىندالادى.
بەيجىڭدەگى وليمپيادا ويىندارى 4 اقپان كۇنى باستالادى. الدىن الا مالىمەتتەر بويىنشا، بۇل ويىندارعا الەمنىڭ 95 ەلىنەن 4 مىڭنان استام سپورتشى قاتىسادى. وندا 109 مەدال جيىنتىعى ساراپقا سالىنادى. ال وليمپيادالىق كوماندا قۇرامىندا ەلىمىزدەن 34 سپورتشى ونەر كورسەتەدى. سپورت تۇرلەرىنە كەلسەك، ايتارلىقتاي وزگەرىس جوق 87 ليتسەنزيامىز بار. وسى اپتادا باسقا سپورت تۇرلەرى بويىنشا ناقتىلانادى. ليتسەنزيالاردىڭ باسىم بولىگىن شاڭعىشىلار (35), كونكيمەن جۇگىرۋشىلەر (12) جانە بياتلونشىلار (12) جەڭىپ الدى.
