ابزال قۇسپاننىڭ ايتۋىنشا، ميتينگكە قاتىسۋشىلارعا قاتىستى قۇقىق قورعاۋ ورگاندارىنداعى ماتەريالدار بويىنشا قوعامدىق كوميسسيا قۇرىلۋى ءتيىس، دەپ حابارلايدى "ادىرنا" ۇلتتىق پورتالى.
«ودان باسقا جولدى كورىپ تۇرعان جوقپىن! ءيا، قىلمىستىق ىستەردى تەرگەۋدىڭ ءوز ءتارتىبى بار، دەگەنمەن زاڭسىز ۇستالدى، زاڭسىز قامالدى، ۇرىپ-سوقتى، ازاپتادى دەگەن ارىز-شاعىمدار لەگى تولاستار ەمەس! ونداي جاعدايدا، قوعام وكىلدەرى بۇل جاعدايدى ءوز باقىلاۋىنا الىپ، كوز جەتكىزۋگە ءتيىستى دەپ ەسەپتەيمىن!» — دەيدى ادۆوكات.
ابزال قۇسپان قۇقىق قورعاۋ ورگاندارىنا، اسىرەسە جەرگىلىكتى جەردەگى وكىلدەرىنە ەل تاراپىنان سەنىم جوقتىعىن العا تارتادى. ونىڭ قاراپايىم مىسالى رەتىندە وزىنە قاتىستى جاعدايدى ايتالى. وسى ايدىڭ 7-ءى كۇنى ورال قالاسىندا بەلگىلى جۋرناليست لۇقپان احمەدياروۆ ەكەۋى پرەزيدەنت اتىنا پەتيتسيا جولداماق بولعان. سونىڭ 4 بولىكتەن تۇراتىن تالابىنىڭ 1-ءسى وسى بەيبىت ميتينگكە قاتىسۋشى بەلسەندىلەردى قۋدالاماۋ تۋرالى بولعان. الايدا لۇقپاندى تاڭەرتەڭ ۇيىنەن اكەتىپ، مەن «ۋرالسكايا نەدەليا» گازەتىنىڭ رەداكتسياسىنان ۇستاپ اكەتىپ قاماپ تاستاعان. ادۆوكاتتىڭ ءوزى اسىعىس جاعدايدا وقىپ جانە ينتەرۆيۋ بەرىپ ۇلگەرگەن.
«بىراق لۇقپانعا، قولداپ كەلگەن بەكنۇر سانجاروۆ جانە ماعان وسى ارەكەتىمىز ءۇشىن سوت 10 تاۋلىككە قاماۋ تۋرالى شەشىم شىعاردى. ەلگە بەلگىلى بىزدەرگە قاتىستى وسىنداي ارەكەتتەرگە بارعان جەرگىلىكتى ورگاندار زاڭنان حابارى جوق، قاراپايىم ازاماتتارعا نە ىستەمەيدى؟! سوندىقتان بۇل ۇندەۋدى قولداۋدى، مەيلىنشە تاراتۋدى سۇرايمىن!» — دەيدى ول.
ابزال قۇسپاننىڭ ۇندەۋىنەن:
ادىلدىك تالاپ ەتكەن، اراشا سۇراعان اعايىن!
قازىر عانا مەملەكەتتىك حاتشىمىز ەرلان قاريننىڭ قابىلداۋىنان شىعىپ كەلەمىن. مەملەكەت باسشىسى قۇقىق قورعاۋ ورگاندارى، ونىڭ ىشىندە ءبىرىنشى كەزەكتە پوليتسياعا ادام قۇقىقتارىن ساقتاۋ تۋرالى قاتاڭ تاپسىرما بەرگەن.
الايدا، جاعىمسىز حاباردى تاراتۋشىلار جاعىنان دا، ءتىپتى سول پوليتسيانىڭ ءوزى تاراپىنان دا جاڭا تارتىپكە مويىنسۇنعىسى كەلمەيتىن ارانداتۋشىلار بار سياقتى. ءدال ونداي ارانداتۋعا باسقا-باسقا قازىرگى ۋاقىتتا اقوردا مۇددەلى ەمەس ەكەنى ايداي انىق قوي، ەندى.
ەندەشە سول جاعدايلاردى قوعام اتىنان تەكسەرىپ كورۋدى بىزگە سەنىپ تاپسىرىپ وتىر. قازىر مەن كوميسسيا قۇرۋدىڭ زاڭدىلىعى، وكىلەتتىگى سياقتى ماسەلەلەردى تالقىلاۋعا باس پروكۋراتۋراعا بارامىن، باستىسى اقوردا قارسى ەمەس! شىققان سوڭ تىكەلەي ەفير جاعدايىندا جۇزدەسىپ، جاعدايدى وزدەرىڭە باياندايتىن، وزدەرىڭىزبەن كەڭەسەتىن بولامىن!
"ادىرنا" ۇلتتىق پورتالى
