الماتى حالىقارالىق اۋەجايىندا قالىپقا كەلتىرۋ جۇمىستارى جالعاسىپ جاتىر. اۋماقتى ءالى دە اسكەري بولىمشەلەر كۇزەتەدى، كىرەبەرىسكە ارنايى تەحنيكالار قويىلعان، - دەپ حابارلايدى “ادىرنا” ۇلتتىق پورتالى كتك ارناسىنا سىلتەمە جاساپ.
تەلەارنا مالىمەتىنشە، ەكى اپتا بۇرىن قارۋلى لاڭكەستەر مەن قاراقشىلار الماتى اۋەجايى تەرمينالىن باسىپ الىپ، قيراتتى. ولار بانكوماتتاردى، ساۋدا ورىندارى مەن كاسسالاردى توناپ، سونىمەن قاتار قىمبات كولىكتەردى ورتەپ، عيماراتتان جيھازدار مەن جابدىقتاردى الىپ شىققان.
"ولاردىڭ قولىندا الىستان قاراعاندا تاياقتار نەمەسە تەمىر، سونىمەن قاتار پوليتسيا قالقاندارى بولدى. ال باستارىندا ارنايى جاساق كاسكالارى بولدى، ونى ءسوزسىز انىق كوردىم. ولار سوندا 10-15 مينۋتتاي جينالدى. ولارمەن بايلانىس ورناتۋ مۇمكىن ەمەس ەدى", - دەپ ەسكە الادى الماتى حالىقارالىق اۋەجايى تەرمينالىنىڭ اۋىسىم باستىعى كەڭەس نۇرامبەكوۆ.
شابۋىل كەزىندە بىرنەشە ۇشاق ۇشۋعا دايىندالىپ جاتقان، ونىڭ ىشىندە 200-دەن استام ادام بولعان. لاينەرلەردى بىردەن قاۋىپسىز جەرگە سۇيرەپ اپارعان. ال ديسپەتچەرلەر الماتى اۋەجايىنا قونۋعا كەلە جاتقان بارلىق رەيستى كەرى قايتارا باستاعان.
"ۇشقىشتار بىردەن بالاما اەرودرومعا قونۋ تۋرالى شەشىم قابىلدادى. ءالى قونباعاندارى. مەنىڭ قاسىمدا ارىپتەستەرىم بولدى، بىراق جۇمىسقا قايتا ورالعاندا جالعىز قالدىم. كەيىن مەنى قورعاۋ ءۇشىن اۆتوماتتارى بار ەكى پوليتسيا قىزمەتكەرىن تاعايىندادى. سوندا قورقىنىش سەيىلدى", - دەدى "الماتى حالىقارالىق اۋەجايى" اق جەدەل باسقارۋ ورتالىعىنىڭ ديسپەتچەرى ايدا قاسىمباەۆا.
وسى ۋاقىتتا تەرمينالدا ناعىز دۇربەلەڭ باستالعان. جولاۋشىلار جۇكتەرىن تاستاپ، شىعۋعا قاراي جۇگىرگەن. شاراسىز ادامدار تىكە ۇشىپ-قونۋ جولاعىنا قاراي شىعىپ كەتكەن. وندا ولاردى اۋەجاي قىزمەتكەرلەرى جيناپ الىپ، اۆتوبۋسپەن بوس انگارلارعا اپاردى.
"تەرمينالدا بولعانداردى ەۆاكۋاتسيالادىق، شامامەن 800-900 ادام بولدى. قولىمىزدا بار كولىكتەر، بارلىعى جۇمىلدىرىلدى. ءتىپتى شاعىن جۇك تاسىعىشتارمەن دە ەۆاكۋاتسيالادىق. جاستار بىزگە قاراي جۇگىردى - مەن مۇنداي كوزدەردى ءبىرىنشى رەت كوردىم. ولار قاندى، كوزدەرى قىزارعان. شىنىمدى ايتسام، ازداپ قورقىنىشتى بولدى", - دەپ مويىندادى "الماتى حالىقارالىق اۋەجايى" اق اۋىسىم باستىعى فارحات ءسابيتوۆ.
10 ساعاتقا جۋىق جولاۋشىلار مەن اۋەجاي قىزمەتكەرلەرى قاراقشىلاردان جاسىرىنعان. تەك تاڭەرتەڭ ولاردىڭ سوڭىنان اسكەريلەر كەلىپ، جاعدايدى باقىلاۋعا الىپ، تەرمينالدى لاڭكەستەردەن بوساتقان. قاقتىعىس سالدارىنان جولاۋشىلار مەن قىزمەتكەرلەردىڭ ەشقايسىسى زارداپ شەككەن جوق.
نەگىزگى سوققى تەرمينالعا تۇسكەن. بىراق شابۋىل كەزىندە قىمبات جابدىقتار مەن اەروناۆيگاتسيالىق جۇيەلەر زاقىمدانباعان. سونداي-اق اۋەجاي قىزمەتكەرلەرى بىردە-ءبىر اۋە لاينەرىنىڭ ۇرلانباعانىن نەمەسە زاقىمدانباعانىن ايتتى.
”ادىرنا” ۇلتتىق پورتالى
Басқалармен бөлісе отырыңыз
