Telearna málimetinshe, eki apta buryn qarýly lańkester men qaraqshylar Almaty áýejaıy termınalyn basyp alyp, qıratty. Olar bankomattardy, saýda oryndary men kassalardy tonap, sonymen qatar qymbat kólikterdi órtep, ǵımarattan jıhazdar men jabdyqtardy alyp shyqqan.
Áýejaı qyzmetkerleriniń aıtýynsha, ǵımaratqa shabýyl 5 qańtarda keshki saǵat segizder shamasynda bastalǵan. Qarýly topty alǵashqylardyń biri bolyp Keńes Nurambekov baıqaǵan. Sol kúni ol reıdke birneshe saǵat qalǵanda aýysymyn qabyldaǵan eken. Radıo arqyly er adam jaǵdaıdy dereý qaýipsizdik qyzmetine habarlaǵan.
"Olardyń qolynda alystan qaraǵanda taıaqtar nemese temir, sonymen qatar polıııa qalqandary boldy. Al bastarynda arnaıy jasaq kaskalary boldy, ony sózsiz anyq kórdim. Olar sonda 10-15 mınýttaı jınaldy. Olarmen baılanys ornatý múmkin emes edi", - dep eske alady Almaty halyqaralyq áýejaıy termınalynyń aýysym bastyǵy Keńes Nurambekov.
Shabýyl kezinde birneshe ushaq ushýǵa daıyndalyp jatqan, onyń ishinde 200-den astam adam bolǵan. Laınerlerdi birden qaýipsiz jerge súırep aparǵan. Al dıspetcherler Almaty áýejaıyna qonýǵa kele jatqan barlyq reısti keri qaıtara bastaǵan.
"Ushqyshtar birden balama aerodromǵa qoný týraly sheshim qabyldady. Áli qonbaǵandary. Meniń qasymda áriptesterim boldy, biraq jumysqa qaıta oralǵanda jalǵyz qaldym. Keıin meni qorǵaý úshin avtomattary bar eki polıııa qyzmetkerin taǵaıyndady. Sonda qorqynysh seıildi", - dedi "Almaty halyqaralyq áýejaıy" AQ jedel basqarý ortalyǵynyń dıspetcheri Aıda Qasymbaeva.
