قازاقستان ينجەنەرلىك-تەحنولوگيالىق ۋنيۆەرسيتەتىندە ينجەنەرلەردىڭ جاڭا بۋىنى مەن تەحنيكالىق مامانداردى قالاي دايارلاۋ قاجەتتىلىگى تالقىلاندى.
قازاقستاننىڭ جوعارى وقۋ ورىندارىنا جاڭا مىندەتتەر قويىلدى. وتاندىق ءبىلىم ورىندارىندا ونەركاسىپ ينجەنەرلەرىنىڭ جاڭا بۋىنىن تاربيەلەۋ، تەحنيكالىق مامانداردى دايىنداۋ قاجەتتىلىگى باستى نازارعا الىندى.
مۇنداي جاڭا مىندەتتەردى مەملەكەت باسشىسى قاسىم-جومارت توقاەۆ 11 قاڭتاردا پارلامەنت ءماجىلىس وتىرىسىندا مالىمدەگەن بولاتىن. قازاقستان ينجەنەرلىك-تەحنولوگيالىق ۋنيۆەرسيتەتىندە 19 قاڭتار كۇنى وتكەن «باسەكەلەستىك ورتاداعى ۋنيۆەرسيتەتتەردىڭ دامۋى: ترەندتەر مەن بولاشاعى» اتتى حالىقارالىق عىلىمي-ادىستەمەلىك كونفەرەنتسيا وسى باعىتتى نەگىزگە الدى.
قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا حالىقارالىق عىلىمي جيىننىڭ اشىلۋىندا: «قازاقستان پرەزيدەنتى «قاسىرەتتى قاڭتار» ساباعى: قوعام تۇتاستىعى – تاۋەلسىزدىك كەپىلى بايانداماسىندا ساپالى بىلىمگە قولجەتىمدىلىكتى ارتتىرىپ، گۋمانيتارلىق ماماندىقتارعا قاراعاندا، ەندى تەحنيكالىق ماماندىقتارعا باسىمدىق بەرىلۋ كەرەكتىگىن، ينجەنەرلەر مەن وندىرىسشىلەردىڭ جاڭا بۋىنىن دايىنداۋ قاجەتتىلىگىن، سونىمەن قاتار، جاقىن ارادا رەسەيدىڭ وزىق تەحنيكالىق جوعارى وقۋ ورىندارىنىڭ فيليالدارىن اشۋدى جوسپارلاۋدى ەرەكشە اتاپ ءوتتى. بۇل ءوز كەزەگىندە ءدال وسى سالادا ماماندار دايىنداپ، ساپالى بىلىمگە ەرەكشە ءمان بەرىپ وتىرعان قازاقستان ينجەنەرلىك-تەحنولوگيالىق ۋنيۆەرسيتەتى ءۇشىن ۇلكەن جاۋاپكەرشىلىك»، - دەپ اتاپ ءوتتى.
جاڭا مىندەتتى نەگىزگە الا وتىرىپ، عىلىمي-ادىستەمەلىك كونفەرەنتسيا جۇمىسىندا شەتەلدىك ارىپتەستەرمەن بىرلەسە ۋنيۆەرسيتەتتەر دامۋىنىڭ جاڭا ترەندتەرى مەن بولاشاعى جايلى، زاماناۋي تالاپتارداعى ۋنيۆەرسيتەتتەردىڭ اتقارار ءرولى تالقىلانىپ، جەتەكشى شەتەلدىك جوعارى وقۋ ورىندارىمەن تاجىريبە الماسىپ، وسى سالاداعى وزەكتى تاقىرىپتار تالقىلاناتىنىن، باسەكەگە قابىلەتتى زامان تالابىنا ساي جاڭا ءبىلىم بەرۋ باعدارلامالارى جاسالاتىنىن جەتكىزدى.
حالىقارالىق عىلىمي جيىنعا رەسەي، ۇلىبريتانيا، لاتۆيا جوعارعى وقۋ ورىندارىنىڭ عالىمدارىمەن قاتار، وتاندىق عالىمدار، مەملەكەت جانە قوعام قايراتكەرلەرى، جوو-لاردىڭ وقىتۋشى-پروفەسسورلار قۇرامى، «بولاشاق» باعدارلاماسىنىڭ تۇلەكتەرى جانە ستۋدەنتتەر قاتىستى.
كونفەرەنتسيادا ءبىلىم بەرۋ ءۇردىسىنىڭ زاماناۋي ترەندتەرى، جوو-دا يننوۆاتسيالىق قىزمەتتى ۇيىمداستىرۋ مەن دامىتۋدىڭ نەگىزگى باعىتتارى، ۋنيۆەرسيتەتتەردىڭ عىلىم مەن يننوۆاتسياداعى ءرولى جانە تاعى دا باسقا وزەكتى ماسەلەلەر تالقىلاندى.
ميكروبيولوگيا جانە ۆيرۋسولوگيا عىلىمي-وندىرىستىك ورتالىعىنىڭ باس ديرەكتورى امانكەلدى سادانوۆ ەلىمىزدەگى فارماتسەۆتيكالىق ازىرلەمەلەر دايىنداۋ بارىسىنا توقتالدى. وتاندىق وندىرىسشىلەردىڭ ءوندىرىپ جاتقان دارىلەرىنىڭ ۇلەس سالماعى وتە از ەكەندىگىن جەتكىزدى. بايانداماسىندا بەلگىلى بولعانداي، بۇگىندە قاراپايىم دارىلىك قۇرالداردىڭ 11 پايىزى قازاقستاندا جاسالسا، قالعان 89 پايىزى يمپورتقا تيەسىلى.
ايتا كەتسەك، پروفەسسور ا. سادانوۆ ەل تاۋەلسىزدىگىنىڭ 30 جىلدىعىندا ءال-فارابي اتىنداعى عىلىم جانە تەحنيكا سالاسىنداعى مەملەكەتتىك سىيلىقتى يەلەندى. امانگەلدى سادانوۆ ءبىزدىڭ ەلىمىز ءۇشىن جاڭا جانە وزەكتى باعىت – بيوتەحنولوگيا مەن توپىراق ميكروبيولوگياسىن زەرتتەيتىن عىلىمي مەكتەپتى قۇرعانىن ايتا كەتكەن ءجون.
قازاقستان ينجەنەرلىك-تەحنولوگيالىق ۋنيۆەرسيتەتىندە ۇيىمداستىرىلعان حالىقارالىق كونفەرەنتسيادا شەتەلدىك عالىمداردىڭ دا وزەكتى باياندامالارى تىڭدالدى.
تاۋلى-التاي مەملەكەتتىك ۋنيۆەرسيتەتىنىڭ (رەسەي) وكىلى توسكاناي كۋتتۋباەۆا جوو-دا يننوۆاتسيالىق قىزمەتتى ۇيىمداستىرۋ مەن دامىتۋدىڭ نەگىزگى باعىتتارىنا توقتالىپ، رەسەيلىك ۋنيۆەرسيتەتتىڭ تاجىريبەسىمەن ءبولىستى. بۇل ۋنيۆەرسيتەتتە مامانداردى دايارلاۋ ورتا كاسىبي ءبىلىم بەرۋ، باكالاۆريات، ماگيستراتۋرا سونىمەن قاتار، سپەتسياليتەت جانە اسپيراتنۋرا ساتىلارىندا جۇرگىزىلەتىنىن باياندادى.
ۇزدىكسىز ءبىلىم بەرۋ جۇيەسىن دامىتۋدى جۇزەگە اسىرۋداعى التاي مەملەكەتتىك ۋنيۆەرسيتەتىنىڭ (رەسەي) ءرولى جايلى بايانداعان التاي مەملەكەتتىك ۋنيۆەرسيتەتى حيميا جانە حيميالىق-فارماتسەۆتيكالىق تەحنولوگيالار ينستيتۋتىنىڭ ديرەكتورى يرينا ميكۋشينا بۇل سالادا جۇمىس بەرۋشىلەر مەن ءبىلىم الۋشىلاردىڭ قىزىعۋشىلىقتارى مەن سۇرانىستارىن ەسكەرۋدى، سونىمەن قاتار جوعارى وقۋ ورنىنا دەيىنگى عىلىمي جوبالىق دايارلىقتاردى قولعا الۋدى، ءبىلىم بەرۋ باعدارلامالارىنىڭ، سونىڭ ىشىندە ماگيستراتۋرا بويىنشا تىڭعىلىقتى جاڭارتىلۋىن العا تارتتى. ۇلىبريتانياداعى گلازگو ۋنيۆەرسيتەتىنىڭ وقىتۋشىسى باقىت تولەگەنوۆ ساپالى ءبىلىم بەرۋ جولدارىنا توقتالدى.
ريگا تەحنيكالىق ۋنيۆەرسيتەتىنىڭ (لاتۆيا) پروفەسسورى ەلەنا چايكو ۋنيۆەرسيتەتتەردەگى ونلاين وقىتۋ جۇيەسىنىڭ بارىسىن تالداسا، وڭتۇستىك-ورال مەملەكەتتىك ۋنيۆەرسيتەتىنىڭ (رەسەي) كافەدرا مەڭگەرۋشىسى يرينا پوتوروكو ۋنيۆەرسيتەتتەردىڭ ءبىلىم بەرۋ ساياساتىنا توقتالدى. ماسكەۋ مەملەكەتتىك تاماق ونىمدەرى ۋنيۆەرسيتەتىنىڭ ينستيتۋت ديرەكتورى تاتيانا دانيلچۋك ءبىلىم بەرۋ ۇدەرىسىنىڭ زاماناۋي سىن-قاتەرلەرى مەن دامۋى جايلى بايانداما جاسادى.
وسى ورايدا وتاندىق عالىمدار دا ءوز ويلارىن ورتاعا سالىپ، ءتۇرلى تاقىرىپتاردا پىكىر الماستى. ءال-فارابي اتىنداعى قازۇۋ-دىڭ كافەدرا مەڭگەرۋشىسى مادينا مانسۇروۆا بەيرەسمي ءبىلىم بەرۋ ناتيجەلەرىن تانۋ جانە ماسەلەلەرى مەن پەرسپەكتيۆالارىن، قازاقستان ينجەنەرلىك-تەحنولوگيالىق ۋنيۆەرسيتەتىنىڭ دەپارتامەنت ديرەكتورى باۋىرجان تاتيبەكوۆ ۋنيۆەرسيتەتتەردىڭ عىلىم مەن يننوۆاتسياداعى ءرولىن تالقىلادى.
ال قازاقستان ينجەنەرلىك-تەحنولوگيالىق ۋنيۆەرسيتەتىنىڭ پروفەسسورى شاربانۋ مۇزدىباەۆا ۋنيۆەرسيتەتتەگى ۇزدىكسىز ءبىلىم بەرۋ سالاسى بويىنشا عىلىمي بايانداماسىمەن ءبولىستى.
قازاقستاندا ينجەنەرلەر مەن تەحنيكالىق ماماندار دايىندايتىن وقۋ ورنى قازاقستان ينجەنەرلىك-تەحنولوگيالىق ۋنيۆەرسيتەتىندەگى ءبىلىم بەرۋ باعدارلامالارى بويىنشا پرورەكتور دارحان اقپانبەتوۆ مالىمدەسە، ۇزاق مەرزىمدى ىنتىماقتاستىققا ارنالعان «قازاقستان ينجەنەرلىك-تەحنولوگيالىق ۋنيۆەرسيتەتى-Financial Economic Lab»: كادرلاردى دايارلاۋ، قايتا دايارلاۋ جانە قازاقستان ينجەنەرلىك-تەحنولوگيالىق ۋنيۆەرسيتەتىنىڭ شەتەلدىك جوعارى وقۋ ورىندارىمەن بىرلەسكەن ءبىلىم بەرۋ باعدارلامالارى بويىنشا «بولاشاق» باعدارلاماسىنىڭ تۇلەگى داۋرەن جولدىبەك باياندادى.
حالىقارالىق ادىستەمەلىك كونفەرەنتسيادا سونىمەن قاتار، ءبىلىم بەرۋ ءۇردىسىنىڭ زاماناۋي ترەندتەرى جايلى قازاقستان ينجەنەرلىك-تەحنولوگيالىق ۋنيۆەرسيتەتى ەكونوميكا جانە فينانس كافەدراسىنىڭ پروفەسسورى ايگۇل توقسانوۆا ايتىپ ءوتتى.
قازاقستان ينجەنەرلىك-تەحنولوگيالىق ۋنيۆەرسيتەتىندە وتكەن «باسەكەلەستىك ورتاداعى ۋنيۆەرسيتەتتەردىڭ دامۋى: ترەندتەر مەن بولاشاعى» حالىقارالىق عىلىمي-ادىستەمەلىك كونفەرەنتسيا ونلاين فورماتتا ZOOM پلاتفورماسىندا جۇرگىزىلىپ، Youtube جەلىسىندە ترانسلياتسيالاندى.
شەتەلدىك جانە وتاندىق عالىمداردىڭ باسىن قوسقان بۇل عىلىمي حالىقارالىق كونفەرەنتسيادا ينجەنەر، تەحنيكا سالاسىندا ساپالى مامانداردى، باسەكەگە قابىلەتتى وندۋرىشىلەردى دايارلاۋعا نەگىز بولاتىن وزىق تاجىريبەلەر ايتىلىپ، ساپالى مامان-كادرلاردى دايارلاۋعا ۇلەس قوساتىن وقىتۋ، ءبىلىم بەرۋ ۇلگىلەرى ۇسىنىلدى.
“ادىرنا” ۇلتتىق پورتالى
