"تاۋارلاردى مىندەتتى تاڭبالاۋ وپەراتورىنىڭ قىزمەتىن توقتاتۋ كەرەك"

1672
Adyrna.kz Telegram

"تاۋارلاردى مىندەتتى تاڭبالاۋ وپەراتورىنىڭ قىزمەتىن توقتاتۋ كەرەك". بۇل تۋرالى «اق جول» فراكتسياسىنىڭ دەپۋتاتتىق ساۋالىندا دانيا ەسپاەۆا ۆيتسە-پرەمەر ب.سۇلتانوۆقا جولدادى، دەپ حابارلايدى "ادىرنا" ۇلتتىق پورتالى. 

مەملەكەت باسشىسى ق.ك. توقاەۆتىڭ 2022 جىلعى 11 قاڭتارداعى پارلامەنت ءماجىلىسىنىڭ وتىرىسىندا سويلەگەن سوزىندە «روپ» (وندىرۋشىلەردىڭ كەڭەيتىلگەن مىندەتتەمەلەرى) وپەراتورى كومپانياسىنىڭ قىزمەتى سىنعا ۇشىراعان بولاتىن. وسى جەكەمەنشىك كومپانيانىڭ قىزمەتىن توقتاتۋ تۋرالى تىكەلەي تاپسىرما بەرىلدى ءارى ەڭ باستىسى، كادەگە جاراتۋ جانە كادەگە جاراتۋ الىمىن جيناۋ جونىندەگى فۋنكتسيالاردى مەملەكەت ورىنداۋعا ءتيىس ەكەنى اتاپ كورسەتىلدى.

«اق جول» قدپ فراكتسياسى بۇل شەشىمدى تۇبەگەيلى قولدايدى. ءدال وسى ءبىزدىڭ فراكتسيامىز 2017 جىلعى 20 قىركۇيەكتە پرەمەر-مينيستر

ب.ءا. ساعىنتاەۆتىڭ اتىنا جولدانعان دەپۋتاتتىق ساۋالدا روپ وپەراتورىنىڭ قۇقىقتىق مارتەبەسى جانە ول جينايتىن اقشا قاراجاتىنىڭ مارتەبەسى تۋرالى ماسەلەنى كوتەرگەن بولاتىن. ءبىز، شىن مانىندە، بۇل سالىق ەكەنىن اتاپ كورسەتكەن ەدىك، بىراق نەلىكتەن ەكەنى تۇسىنىكسىز، اتالعان سالىققا جەكەمەنشىك تارتىپپەن ءارى بيۋدجەتتى اينالىپ ءوتىپ يەلىك ەتۋدە. ءبىز روپ وپەراتورىن قۇرۋ كەزىندە اكتسيونەر ۇكىمەت بولۋعا ءتيىس دەگەن ماسەلەنى كوتەردىك. وكىنىشكە قاراي، سول كەزدە ءبىزدىڭ سوزىمىزگە ەشكىم قۇلاق اسپاعان ەدى.

بۇگىن ءبىز تاۋارلاردى مىندەتتى تاڭبالاۋ ماسەلەسىن كوتەرۋگە ءماجبۇرمىز. «اق جول» فراكتسياسىنىڭ دەپۋتاتتارى 2018 جىلى تاۋارلاردى تاڭبالاۋ تۋرالى كەلىسىمنىڭ راتيفيكاتسيالانۋىن قولدامادى. سونىمەن قاتار، ءبىز ەۋرازيالىق ەكونوميكالىق وداق كوميسسياسىنىڭ الاڭىندا تاڭبالاۋعا جاتاتىن تاۋارلار تىزبەسىن نەگىزسىز كەڭەيتۋدى قايتا قاراۋ تالابىمەن ۇكىمەتتىڭ اتىنا ەكى رەت حات جولدادىق.

تاۋارلاردى تاڭبالاۋدى، شىن مانىندە، حالىقارالىق پراكتيكادا قولدانىلاتىنداي، كولەڭكەلى، زاڭسىز تاۋارلارمەن كۇرەسۋ تەتىگى رەتىندە اكتسيزدەلەتىن تاۋارلار توبى ءۇشىن عانا قولدانۋ كەرەك ەكەنىن اتاپ وتتىك.

«اق جول» فراكتسياسى ۇكىمەتتىڭ نازارىن مىندەتتى تاڭبالاۋدى ەنگىزۋ تۇتىنۋ تاۋارلارى مەن تاماق ونىمدەرىنىڭ قىمباتتاۋىنا الىپ كەلەتىنىنە، بيزنەس ءۇشىن ەسەپتىلىكتە ەلەۋلى پروبلەمالار تۋعىزاتىنىنا اۋدارعان بولاتىن.

شەنەۋنىكتەر ءبىزدى بۇل بولمايدى دەپ سەندىرگەن، بىراق وتكەن جىلى پيلوتتىق جوبا تاڭبالاۋدىڭ ەنگىزىلۋى ءسۇت ونىمدەرىنىڭ 35%-عا قىمباتتاۋىنا الىپ كەلگەنىن كورسەتتى. سونىڭ ناتيجەسىندە ولار ودان باس تارتتى.

بىراق اياقكيىم ءۇشىن تاڭبالاۋدى ەنگىزدى، سودان كوپتەگەن اياقكيىم دۇكەندەرىنە جۇمىسىنىڭ توقتاپ قالۋ قاۋپى ءتونىپ ءتۇر، كاسىپكەرلەر باعانىڭ

20-25%-عا وسكەنىن ايتىپ وتىر، بۇل جالپى ينفلياتسياعا ۇلەسىن قوسۋدا.

باسقا تاۋارلار ءۇشىن دە تاڭبالاۋدى ەنگىزۋ كەزەكتە تۇر: ماسەلەن، ۇكىمەتتىڭ 2020 جىلعى 10 قىركۇيەكتەگى №568 قاۋلىسىنا سايكەس توقىما ونىمىنە، سۋ مەن سۋسىندارعا، دارىلىك زاتتارعا تاڭبالاۋدى ەنگىزۋ مەرزىمدەرى بەلگىلەنگەن. كەزەكتە باسقا دا ونىمدەر بار.

ەستەرىڭىزگە سالا كەتەيىك، 2020 جىلعى 19 مامىردا پرەزيدەنت ق. توقاەۆ جوعارى ەۋرازيالىق ەكونوميكالىق كەڭەستىڭ وتىرىسىندا تاۋارلاردى مىندەتتى تاڭبالاۋدى ەنگىزۋدى كەيىنگە قالدىرۋدى جانە بۇل ماسەلەنى اناعۇرلىم مۇقيات زەردەلەۋدى ۇسىنعان بولاتىن.

الايدا، ۇكىمەت ونى ەنگىزۋدى جالعاستىرۋدا.

سونىمەن بىرگە، مەملەكەت ەنگىزەتىن كەز كەلگەن مىندەتتى تولەمدەر ءوزىنىڭ تابيعاتى بويىنشا سالىق دەپ ەسەپتەلۋگە ءتيىس.

مىسالى، الكوگول مەن تەمەكى ونىمدەرىنە ارنالعان ءدال سول اكتسيزدىك ماركالار، ولار دا نارىقتىڭ اشىقتىعىن قامتاماسىز ەتۋگە باعىتتالعان.

وسىعان بايلانىستى، «اق جول» فراكتسياسى مەملەكەت اتىنان ەنگىزىلەتىن مىندەتتى تولەمدەر – ال بۇل تولەمدەر، شىن مانىندە، سالىقتار – نەلىكتەن جەكەمەنشىك كومپانياعا – تاڭبالاۋ وپەراتورىنا كەلىپ تۇسەدى دەگەن سۇراقتى قايتادان كوتەرۋگە ءماجبۇر.

ماسەلەن، تاۋارلاردى تاڭبالاۋ مەن قاداعالاۋدىڭ بىرىڭعاي وپەراتورى بولىپ 49% جەكەمەنشىك قۇرىلىمدارعا تيەسىلى «قازاقتەلەكوم» اكتسيونەرلىك قوعامى ايقىندالعان.

بۇل جەردە مەملەكەت باسشىسى تولەمدەرگە قاتىستى ماسەلەسىنىڭ باسىن اشىپ، ولاردىڭ جەكە تۇلعالارعا ەمەس، مەملەكەتكە ءتۇسۋىن قامتاماسىز ەتۋدى تاپسىرعان كادەگە جاراتۋ الىمىمەن جانە روپ-مەن ەرىكسىز سالىستىرۋعا تۋرا كەلەدى.

جوعارىدا ايتىلعانداردىڭ نەگىزىندە، «اق جول» قدپ فراكتسياسى:

1) ۇلتتىق ەكونوميكالىق مۇددەلەردى قورعاۋ ماقساتىندا ەۋرازيالىق ەكونوميكالىق كوميسسياعا تاڭبالاۋعا جاتاتىن تاۋارلار تىزبەسىن كەڭەيتۋدى توقتاتا تۇرۋ تۋرالى ۇسىنىس ەنگىزۋدى.

2) تاۋارلاردى تاڭبالاۋدى ەنگىزۋ تۇتىنۋ نارىعىنداعى باعانىڭ وسۋىمەن قاتار جۇرەتىن جەردە ودان باس تارتۋدى.

3) تاڭبالاۋ وپەراتورىنىڭ فۋنكتسيالارىن مەملەكەتكە بەرۋدى جانە تاۋارلاردى تاڭبالاۋدان قاراجاتتىڭ ەل بيۋدجەتىنە ءتۇسۋىن قامتاماسىز ەتۋدى سۇرايدى.

پىكىرلەر