قر مادەنيەت جانە سپورت ءمينيسترى داۋرەن اباەۆ الەم شاحماتى تاريحىنداعى ەڭ جاس الەم چەمپيونى ءبيبىسارا اساۋباەۆامەن كەزدەستى. بۇل تۋرالى مينيسترلىكتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەزدەسۋ بارىسىندا مينيستر ءبيبىسارا اساۋباەۆانى قۇتتىقتاي كەلە، اناسى ليانا تاڭجارىقوۆاعا العىسىن ءبىلدىرىپ، «دەنە شىنىقتىرۋ مەن سپورتتى دامىتۋعا سىڭىرگەن ەڭبەگى ءۇشىن» توسبەلگىسىمەن ماراپاتتادى.
«ءبيبىسارا – ەل ماقتانىشى. بۇكىل الەم كوز تىككەن بەدەلدى تۋرنيردەگى ءبيبىسارا اساۋباەۆانىڭ جارقىن جەڭىسى، ەلىمىزدەگى شاحمات تاريحىندا التىن ارىپپەن جازىلاتىن بولادى. وسى ورايدا ءبيبىسارانىڭ اتا-اناسىنا، جاتتىقتىرۋشىلارىنا ەرەكشە العىس بىلدىرگىم كەلەدى. ءبيبىسارا اساۋباەۆانىڭ ايتۋلى جەڭىسى وسەلەڭ ۇرپاقتىڭ شاحمات سپورتىنا دەگەن قىزىعۋشىلىعىن ارتتىرىپ، ىنتالاندىراتىنى ءسوزسىز»، - دەپ اتاپ ءوتتى مادەنيەت جانە سپورت ءمينيسترى.
ەستەرىڭىزگە سالا كەتەيىك، پولشا استاناسى ۆارشاۆا قالاسىندا وتكەن الەم چەمپيوناتىندا 17 جاستاعى قازاقستاندىق شاحماتشى ءبيبىسارا اساۋباەۆا «بليتستە» ءبىرىنشى ورىندى جەڭىپ الىپ، الەمدىك شاحمات تاريحىندا ايەلدەر اراسىندا ەڭ جاس شاحماتشى اتاعىنا يە بولدى.
سونداي-اق اتالمىش چەمپيوناتتا ءبيبىسارا جىلدام شاحماتتان (راپيد) 2-ورىندى يەلەندى. بۇعان دەيىن قازاقستاندىق سپورتشى ءبيبىسارا اساۋباەۆا قىزدار اراسىندا 8, 10, 12 جانە 14 جاسقا دەيىنگى كلاسسيكالىق شاحماتتان الەم چەمپيونى، 7, 9 جاسقا دەيىنگى وقۋشىلار اراسىندا الەم چەمپيونى اتانعان.
«ادىرنا» ۇلتتىق پورتالى
