شىمكەنت قالاسىنىڭ اكىمى مۇرات ايتەنوۆ قاراتاۋ اۋدانى اۋماعىنداعى ەلدى مەكەندەردى ينفراقۇرىلىم جۇيەلەرىمەن قامتۋ جۇمىستارىنىڭ بارىسىن تەكسەردى. شاھار باسشىسى الدىمەن «تۇران» شاعىناۋدانىنداعى اتقارىلعان جۇمىستاردى قاداعالاپ، تۇرعىندارمەن كەزدەستى.
ەلدى مەكەندەردى ينجەنەرلىك جەلىلەرمەن قامتۋدىڭ جول كارتاسى بەكىتىلگەن. قالا شاعىناۋداندارى مەن تۇرعىن الاپتارىندا ايقىندالعان وزەكتى ماسەلەلەر وسى مەجەگە سايكەس كەزەڭ-كەزەڭىمەن شەشىلەتىن بولادى.
«تۇران» شاعىناۋدانىندا مەردىگەر «StroyGazCompany» جشس تاراپىنان 6,6 شاقىرىم ماگيسترالدى گاز قۇبىرى تارتىلدى. 2-ءشى كەزەڭ بويىنشا ماگيسترالدىق جۇيەلەر قۇرىلىسىنىڭ جوبالىق-سمەتالىق قۇجاتتاماسى دايىن. مەمساراپتاما كورىتىندىسى الىنىپ، 2022 جىلعا مەملەكەتتىك بيۋدجەتتەن قارجى بولىنگەن. 3-ءشى كەزەڭ بويىنشا جالپى «تۇران» شاعىناۋدانىن ابونەتتەۋ بويىنشا جسق دايىندالدى.
ەلەكتر قۋاتىمەن قامتاماسىز ەتۋدە «ابم بيلدينگ» جشس تاراپىنان ماگيسترالدى جۇيەلەر قۇرىلىسى اتقارىلۋدا. مەردىگەر مەكەمە ماگيسترالدى جانە ىشكى ورامدىق جۇيەلەر قۇرىلىسىن بيىل قاراشا ايىندا اياقتاۋدى جوسپارلاۋدا. جالپى 70 مىڭ حالىق ساپالى گازبەن قامتىلادى.
شاعىناۋداندا 6,88 شاقىرىم ماگيسترالدى سۋاققى قۇرىلىسى جانە ءبىرىنشى كەزەڭ بويىنشا ىشكى ورامدىق جۇيەلەردىڭ قۇرىلىسى اياقتالعان.
سونداي-اق، وتكەن جىلى جاڭادان اشىلعان مەكتەپكە ءبىر شاقىرىم كىرمە جولدار جاسالعان. بەكىتىلگەن ءىس-شارا جوسپارىنا سايكەس، 2023 جىلى 3,4 شاقىرىم (6 كوشە), 2024 جىلى 4,9 شاقىرىم (6 كوشە), 2025 جىلى 4,3 شاقىرىم (7 كوشە) بويىنشا اسفالت توسەۋ جۇمىستارى جۇرگىزىلەدى. قازىرگى ۋاقىتتا ەلدىمەكەن تۇرعىندارىنا №17 جانە №75 باعىتتاعى اۆتوبۋستار تۇراقتى قىزمەت كورسەتۋدە.
قالا اكىمى اتالعان جۇمىستاردىڭ بارلىعى تۇرعىنداردىڭ يگىلىگى ءۇشىن اتقارىلىپ جاتقانىن اتاپ ءوتتى. ەلدى مەكەندەردە ازاماتتار ءۇشىن لايىقتى ءومىر ساپاسىن قامتاماسىز ەتۋ باعىتىندا اۋقىمدى جۇمىستار جوسپارلى تۇردە جۇزەگە اسىپ، ەلدى مەكەندەگى وزەكتى ماسەلەلەر رەتىمەن شەشىلەتىندىگىن ايتتى.
شىمكەنت قالاسى اكىمدىگىنىڭ ءباسپاسوز قىزمەتى
