ارحەولوگ ەرلان جاعىپاروۆ ءولىم الدىندا اياۋسىز سوققىعا جىعىلىپ، ازاپتالدى، دەپ حابارلادى ونىڭ ءىنىسى نۇرلان جاعىپاروۆ. بۇل تۋرالى "ادىرنا" ۇلتتىق پورتالى جازادى.
- ءبىز ونى ءمايىتحانادان الىپ كەتكەندە، ونىڭ جۇرەك تۇسىنا، ىشىنە وق تيگەنىن انىقتادىق. قولدارى سالبىراپ، سىنىپ كەتكەن، سۇيەكتەرى سىنعان. ولگەنگە دەيىن ازاپتاعان، قيناعان. دەنەسىندە سوققى ىزدەرى بار، - دەدى جاعىپاروۆ ءباسپاسوز كونفەرەنتسياسىندا.
بۇل رەتتە ول ەرلاننىڭ دوسىنا قوڭىراۋ شالىپ، ونى ۇلتتىق ۇلاننىڭ ساربازدارى ۇستاعانىن حابارلاپ ۇلگەرگەنىن اتاپ ءوتتى.
- 6 قاڭتار كۇنى ساعات 19.30-دا ۇيىنە كەلىپ، كولىگىن قويىپ، الاڭدى كورۋگە كەتكەن. ساعات 19.52-دە ول دوسىنا قوڭىراۋ شالىپ، ونى ۇلتتىق ۇلان ساربازدارى ۇستاعانىن ايتىپ ۇلگەرگەن. وسىدان كەيىن بايلانىس جوعالىپ كەتتى، ءبىز ونى بەس كۇن بويى تابا الماي، ونى 11-كۇنى كەشكى ءمايىتحانادان تاپتىق. ءمايىتحانادا ول «قولى كىسەندەلگەن ازيالىق ۇلتتىڭ بەلگىسىز ادامى» دەپ جازىلعان. ۇيدەن شىققان كەزدە وزىمەن بىرگە قۇجاتتارى بولدى. جاقىن جەردە تۇراتىن، ياعني ونىڭ جەرگىلىكتى تۇرعىن ەكەنىن جانە نارازىلىق بىلدىرۋشىلەرگە ەش قاتىسى جوق ەكەنىن انىقتاۋ وڭاي. ەرلان قوعامدىق قىزمەتكە، ۆولونتەرلىك جۇمىسقا بەلسەندى ارالاستى، ەرىكتى بولدى. كوپتەگەن تاريحي ارتەفاكتىلەرى بار ۇلكەن اۋماقتاردى قۇتقارۋمەن، قازاقستان مادەني مۇراسىن ساقتاۋمەن اينالىستى. ياعني، ول بەلسەندى ازامات ەدى، مۇنىڭ ءبارىن ءبىزدىڭ ۇرپاقتارىمىز ءۇشىن ساقتاۋعا تىرىستى. سوندىقتان، مەن بەيبىت تۇرعىن قايتىس بولدى دەپ ەسەپتەيمىن، - دەدى جاعىپاروۆ.
مارقۇمنىڭ تۋىستارى ىزدەستىرۋ شارالارىن جۇرگىزىپ، قىلمىسكەرلەردى جازالاۋدى كوزدەپ وتىر.
- ءبىز وسى اپتادا اعامىزدىڭ ءولتىرۋ فاكتىسى بويىنشا قۇقىق قورعاۋ ورگاندارىنا حابارلاسۋدى جوسپارلاپ وتىرمىز. ءبىز بارلىق ينستانتسيالارعا شاعىم بەرىپ، جۇگىنەتىن بولامىز. ءبىزدىڭ مىندەتىمىز – وبەكتيۆتى تەرگەۋ جۇرگىزىپ، بارلىق قاتىسى بارلاردى، كىنالىلەردى انىقتاۋ. قانداي دا ءبىر اقپاراتقا يە ادامدار كىنالىلەردى جازالاۋعا ىقپال ەتسىن دەپ حالىققا ۇندەۋ جاسايمىز. بەيبىت تۇرعىن قايتىس بولدى، مەن قىلمىسكەرلەردىڭ انىقتاپ، جازالانعانىن قالايمىن، - دەدى ءىنىسى نۇرلان جاعىپاروۆ.
ەرلان جاعىپاروۆ تۇركى حالىقتارىنىڭ تاريحى مەن ارحەولوگياسىنا، ومىرگە قۇشتار ادام ەدى. قازاقستاننىڭ تاريحي-مادەني مۇراسىن زەرتتەۋ جانە ساقتاۋ بويىنشا ءتۇرلى عىلىمي ەكسپەديتسيالارعا بەلسەنە قاتىسقان.
"ادىرنا" ۇلتتىق پورتالى
