"ساياسي تۇتقىن" دەپ تانىلعان كەنجەبەك ابىشەۆ قايتىس بولدى

8957
Adyrna.kz Telegram

بۇگىن، 17 قاڭتار كۇنى ازاماتتىق بەلسەندى، اقىن، تۇرمەدەگى جىلدارى "ساياسي تۇتقىن" دەپ تانىلعان كەنجەبەك ابىشەۆ 56 جاسقا قاراعان شاعىندا قايتىس بولدى. قارالى حاباردى ازاتتىقا ابىشەۆتىڭ ايەلى گۇلميرا ابىشەۆا راستادى، دەپ حابارلايدى "ادىرنا" ۇلتتىق پورتالى ازاتتىققا سىلتەمە جاساپ. 

– تاڭعى بەس جارىمدا ءجۇرىپ كەتتى. "اسقازانىم شەگە جۇتىپ قويعانداي بوپ، اۋىرىپ تۇر" دەپ شاعىمداندى. جەدەل جاردەم شاقىرىپ ەدىم، ولار كەلگەنشە ءجۇرىپ كەتتى. "جۇرەگى، ينفاركت" دەدى. قۋانىشىم ۇزاققا بارمادى عوي، كونەم عوي، نە ىستەيمىن باسقا؟، – دەدى جاسىن تىيا الماعان بەلسەندىنىڭ ايەلى.

كەنجەبەك ابىشەۆ بىلتىر 13 قازاندا شارتتى تۇردە مەرزىمىنەن بۇرىن بوساپ شىققان ەدى. ول "جازاسىنىڭ" قالعان بولىگى ياعني، 2 جىل 4 اي 20 كۇندى بوستاندىعى شەكتەلگەن كۇيى وتەۋى ءتيىس-ءتىن.

الماتى وبلىستىق سوتى 2018 جىلعى 21 جەلتوقساندا كەنجەبەك ابىشەۆتى "تەرروريزمدى ناسيحاتتادى" دەگەن ايىپپەن جەتى جىلعا سوتتاعان ەدى. بيلىك ونى "قازاقستاننىڭ دەموكراتيالىق تاڭداۋى" قوزعالىسىنا قاتىسى بار دەپ ايىپتادى. نۇر-سۇلتان سوتى بۇل قوزعالىستى ەكسترەميستىك ۇيىم دەپ تانىعان. بىراق ەۋروپارلامەنت ونى بەيبىت ۇيىم دەپ اتاعان. قوزعالىسقا قۋعىنداعى ەكس-بانكير، قازىر شەتەلدە تۇراتىن مۇحتار ءابليازوۆ جەتەكشىلىك ەتەدى.

2019 جىلى اپەللياتسيالىق سوت ۇكىمدى وزگەرىسسىز قالدىرعان. بىراق 2020 جىلعى 13 ناۋرىزدا قاپشاعاي قالالىق سوتى جازا مەرزىمىن ازايتقان.

قازاقستاندىق قۇقىق قورعاۋشىلار كەنجەبەك ابىشەۆتى ساياسي تۇتقىن دەپ تانىعان. بىلتىر 11 اقپاندا ەۋروپارلامەنت قازاقستانداعى ادام قۇقىعى احۋالى تۋرالى قابىلداعان قارارىندا نۇر-سۇلتاندى ەلدە تۇرمەدە وتىرعان ساياسي تۇتقىنداردى بوساتۋعا ۇندەگەن. قاراردا 28 ساياسي تۇتقىننىڭ ءبىرى كەنجەبەك ابىشەۆتىڭ دە اتى اتالدى. قازاقستان بيلىگى ەلدە ساياسي تۇتقىن جوق دەپ ەسەپتەيدى.

"ادىرنا" ۇلتتىق پورتالى

پىكىرلەر