Búgin, 23 jeltoqsan kúni aımaq basshysy Nurlan Noǵaevtyń qatysýymen Qazaqstannyń eńbek sińirgen qaıratkeri, jazýshy Ánes Saraıdyń «Adaı tarıhy» kitabynyń tusaýkeseri ótti, dep habarlaıdy Mańǵystaý oblysy ákiminiń baspasóz qyzmeti.
Sharaǵa Ánes Saraıdyń jubaıy Altynshash Jaǵanova, Qazaqstan Jazýshylar odaǵynyń basqarma tóraǵasynyń orynbasary Mereke Qulkenov pen óńirdiń zııaly qaýym ókilderi men aqyn-jazýshylary qatysty.
Ánes Saraı ózi kózi tirisinde baspaǵa ázirlep ketken jańa eńbek kóne tas dáýiri men Alashorda kezeńi aralyǵyndaǵy Mańǵystaý ólkesiniń tarıhyn qamtıdy. Onda Ánes Saraı qazaq handyǵynyń eleýli oqıǵalaryna, adaı rýynyń urpaqtaryna, adaılardyń basqa rýlarmen qarym-qatynasyna toqtalady.
Oblys ákimi Nurlan Noǵaev sharaǵa qatysýshylardy jınaqtyń tusaýkeserimen quttyqtap, Ánes Saraıdyń qazaq ádebıetine qosqan eleýli úlesin atap ótti.
- «Adaı tarıhy» eńbegi adaı rýy jaıynda ǵana jazylmaǵan. Onda mıllıondaǵan jyldar buryn qazaq jerinde oryn alǵan oqıǵalar kezeń-kezeńimen kiristirilgen. Ótkendi ulyqtaý-óskendiktiń belgisi demekshi, jas býynǵa Otanynyń tarıhyn, halqynyń dástúrin bilý shart. Bul oraıda Ánes aǵamyzdyń eńbegi ólsheýsiz. Jańa jınaq - el rýhanııatyn damytýǵa qosylǵan taǵy bir shyǵarma, - dedi Nurlan Noǵaev.
Aıta keteıik, Ánes Saraı qazaq tarıhyna qatysty buryn aıtylmaı, aınalysqa túspeı júrgen ǵylymı derekterdi zerttep, «Edil-Jaıyq» trılogııasy, «Isataı men Mahambet», «Asyldyń synyǵy», taǵy da basqa ádebı eńbekti jaryqqa shyǵardy. Ol «Edil-Jaıyq» romany úshin 1992 jyly QR Memlekettik syılyǵyna ıe bolǵan. 2021 jyldyń aqpan aıynda belgili jazýshy Ánes Saraı dúnıe saldy.
"Adyrna" ulttyq portaly
