16 tamyz künı Maŋǧystauda ūlttyq salt-dästür men ädet-ǧūrypty därıpteitın «Aq Maia Fest» atty şūbat festivalı öttı. Tūmsa tabiǧatyna talaidy tamsyndyrǧan Airaqty etegındegı festivalge 15 myŋǧa juyq halyq jinaldy. Onyŋ qatarynda Resei, Fransiia, Qyrǧyzstan, Angliia jäne Europanyŋ bırneşe qalalarynan kelgen turistter bar.
Halqymyzdyŋ ömır salty, dünietanymy tabiǧatpen ündes ekenın aiǧaqtaǧan festivalde qazaqtyŋ ūlttyq susyny - şūbatqa airyqşa män berıldı. Tabiǧi susyn tek dämı üşın ǧana emes, densaulyq pen dästürdıŋ jarşysy retınde keŋınen nasihattaldy. Qonaqtar arnaiy daiyndalǧan «Aq maia Lounge» jäne «Shubat Bar» aimaqtarynda şūbattyŋ san aluan nūsqalarynan däm tatty. Klassikalyq qalpynan bölek, jidek qosylǧan, jalbyz aralasqan jäne tıptı mūzben salqyndatylǧan şūbattyŋ jaŋa türlerı ūsynyldy. Sonymen qatar, şūbat negızınde jasalǧan «Shubat Mojito», «Desert Breeze», «White Steppe» tärızdı erekşe kokteilder de festival qonaqtaryn täntı ettı.
«Aq maia Lab» aimaǧynda şūbat daiyndau prosesın közben körıp, tıkelei qatysu mümkındıgı tudy. Keluşılerge şūbatty qalai daiyndau, qandai qūral-saimandar qoldanylatyny jäne onyŋ adam aǧzasyna tigızetın paidasy jaiynda tolyq aqparat berıldı. Şaǧyn şeberlık saǧattary arqyly ärbır qatysuşy ūlttyq susynnyŋ daiyndalu qyr-syryn meŋgere aldy.
Festivalde qazaqtyŋ ūlttyq oiyndary da jiylǧan qauym nazaryna ūsynyldy. «Steppe Games» aimaǧynda asyq atu, sadaq atu, gir köteru siiaqty qyzyqty jarystar ūiymdastyryldy. Al «Art-Yurta» men «Shubat Talks» bölımderınde kiız üi ışınde leksiialar, stendaptar men paidaly şeberlık sabaqtary öttı. Mūnda mädeniet, salt-dästür, densaulyq pen dūrys tamaqtanu turaly paidaly aqparattar aityldy. Auqymdy ıs-şaraǧa şūbat öndıretın jergılıktı fermerler de şaqyrylyp, ūlttyq susynnyŋ daiyndalu jolymen bölıstı.
Keş baǧdarlamasynda qazaq estradasynyŋ tanymal jūldyzdary Erke Esmahan, Raim, Luina, Amre jäne Yenlik sahnany änge bölep, körermenge merekelık köŋıl-küi syilady. Är janrdy bırıktırgen sahnalyq şouda simfoniialyq orkestr, didjeiler men rep oryndauşylar öner körsetıp, muzykalyq keşke zamanaui lep qosty.
Keştıŋ şaryqtau şegınde Maŋǧystau aspanyn erekşe taŋǧajaiyp körınıske bölegen dron şou öttı. Bır mezette 300-den astam dron kökke köterılıp, Qazaqstannyŋ tuy, Maŋǧystau tabiǧatynyŋ körınısterı, «Aqtau - Türkı älemınıŋ mädeni astanasy» logotipı men ūlttyq oiu-örnekter beinelenıp, tamaşalaǧan jūrtty taŋdai qaqtyrdy.
Şara soŋynda 100-ge juyq erıktı men tūrǧyndar mereke ötken alaŋdy qoqystan tazartyp, qorşaǧan orta degen qūrmetın körsettı.
