بۇگىن، 23 جەلتوقسان كۇنى ايماق باسشىسى نۇرلان نوعاەۆتىڭ قاتىسۋىمەن قازاقستاننىڭ ەڭبەك سىڭىرگەن قايراتكەرى، جازۋشى انەس سارايدىڭ «اداي تاريحى» كىتابىنىڭ تۇساۋكەسەرى ءوتتى، دەپ حابارلايدى ماڭعىستاۋ وبلىسى اكىمىنىڭ ءباسپاسوز قىزمەتى.
شاراعا انەس سارايدىڭ جۇبايى التىنشاش جاعانوۆا، قازاقستان جازۋشىلار وداعىنىڭ باسقارما توراعاسىنىڭ ورىنباسارى مەرەكە قۇلكەنوۆ پەن ءوڭىردىڭ زيالى قاۋىم وكىلدەرى مەن اقىن-جازۋشىلارى قاتىستى.
انەس ساراي ءوزى كوزى تىرىسىندە باسپاعا ازىرلەپ كەتكەن جاڭا ەڭبەك كونە تاس ءداۋىرى مەن الاشوردا كەزەڭى ارالىعىنداعى ماڭعىستاۋ ولكەسىنىڭ تاريحىن قامتيدى. وندا انەس ساراي قازاق حاندىعىنىڭ ەلەۋلى وقيعالارىنا، اداي رۋىنىڭ ۇرپاقتارىنا، ادايلاردىڭ باسقا رۋلارمەن قارىم-قاتىناسىنا توقتالادى.
وبلىس اكىمى نۇرلان نوعاەۆ شاراعا قاتىسۋشىلاردى جيناقتىڭ تۇساۋكەسەرىمەن قۇتتىقتاپ، انەس سارايدىڭ قازاق ادەبيەتىنە قوسقان ەلەۋلى ۇلەسىن اتاپ ءوتتى.
- «اداي تاريحى» ەڭبەگى اداي رۋى جايىندا عانا جازىلماعان. وندا ميلليونداعان جىلدار بۇرىن قازاق جەرىندە ورىن العان وقيعالار كەزەڭ-كەزەڭىمەن كىرىستىرىلگەن. وتكەندى ۇلىقتاۋ-وسكەندىكتىڭ بەلگىسى دەمەكشى، جاس بۋىنعا وتانىنىڭ تاريحىن، حالقىنىڭ ءداستۇرىن ءبىلۋ شارت. بۇل ورايدا انەس اعامىزدىڭ ەڭبەگى ولشەۋسىز. جاڭا جيناق - ەل رۋحانياتىن دامىتۋعا قوسىلعان تاعى ءبىر شىعارما، - دەدى نۇرلان نوعاەۆ.
ايتا كەتەيىك، انەس ساراي قازاق تاريحىنا قاتىستى بۇرىن ايتىلماي، اينالىسقا تۇسپەي جۇرگەن عىلىمي دەرەكتەردى زەرتتەپ، «ەدىل-جايىق» تريلوگياسى، «يساتاي مەن ماحامبەت»، «اسىلدىڭ سىنىعى»، تاعى دا باسقا ادەبي ەڭبەكتى جارىققا شىعاردى. ول «ەدىل-جايىق» رومانى ءۇشىن 1992 جىلى قر مەملەكەتتىك سىيلىعىنا يە بولعان. 2021 جىلدىڭ اقپان ايىندا بەلگىلى جازۋشى انەس ساراي دۇنيە سالدى.
"ادىرنا" ۇلتتىق پورتالى
