1 qyrküiek – Bılım künı qarsaŋynda Maŋǧystau oblysynda bes jaŋa mektep aşyldy. Onyŋ törteuı Memleket basşysy Qasym-Jomart Toqaevtyŋ bastamasymen jüzege asyrylǧan «Keleşek mektep» ūlttyq jobasy aiasynda salynsa, bıreuı demeuşılerdıŋ qoldauymen boi köterdı.
Jaŋa bılım nysandarynyŋ bırı – Beineu audany Sam auylyndaǧy 300 oryndyq mektep. Aşylu räsımıne oblys äkımı Nūrdäulet Qilybai, ardagerler, ūstazdar men auyl tūrǧyndary qatysty.
Saltanatty jiynda oblys äkımı jinalǧandardy bılım künımen qūttyqtap, jaŋa mektepterdıŋ öŋır üşın maŋyzdylyǧyn atap öttı.
- Memleket basşysy bılım salasyn damytuǧa ärqaşan airyqşa köŋıl böledı. Bügın paidalanuǧa berılıp otyrǧan jaŋa mektepter – osy qamqorlyqtyŋ naqty nätijesı. Prezidenttıŋ tapsyrmasymen salynǧan zamanaui bılım ordalary şalǧaida jatqan auyldarǧa da jetıp, balalardyŋ sapaly bılım aluyna mümkındık berıp otyr. Būl bılım ordasynda şäkırtterdıŋ jan-jaqty damuyna, mūǧalımderdıŋ şyǧarmaşylyqpen eŋbek etuıne barlyq jaǧdai jasalǧan. Osy şaŋyraqtan tülep ūşatyn tülekter elımızdıŋ damuyna üles qosatyn bılımdı de otanşyl azamat bolady dep senemın. Barşaŋyzdy bılım künımen qūttyqtaimyn, jaŋa oqu jyly sättı ärı tabysty bolsyn, – dedı Nūrdäulet Qilybai.
Sam auylyndaǧy mektepte qazırgı taŋda 151 oquşy bılım aluda, 40 pedagog eŋbek etedı. Mektepte 27 oqu kabinetı, 18 qosymşa bölme, himiia, biologiia, informatika, robototehnika, STEM, öner jäne muzyka synyptary qarastyrylǧan. Sonymen qatar logoped pen psiholog kabinetterı, sport jäne akt zaly, ashana, kıtaphana, şeberhana, medisinalyq bölme men mūrajai bar.
Būdan bölek, jaŋa oqu jyly qarsaŋynda Aqtau qalasynyŋ «Rauan» şaǧyn audanynda – 300 oryndyq, Mūnaily audanynyŋ Batyr auylyndaǧy «Samal» şaǧyn audanynda – 1200 oryndyq, Beineu auylynda – 600 oryndyq jäne Tüpqaraǧan audanynyŋ Saiyn-Şapaǧatov auylynda demeuşılerdıŋ qoldauymen 1200 oryndyq mektep aşyldy. Būl nysandardyŋ ıske qosyluy Mūnaily men Tüpqaraǧan audandarynda üş auysymdy oqytudy tolyqtai joiylyp, Beineu audanyndaǧy bır apatty mekteptıŋ mäselesın şeşıp otyr.
Jalpy, jaŋa oqu jylynda Maŋǧystau oblysynda 157 mektep jūmysyn bastady. Öŋırde 213 myŋnan astam oquşy bılım aluda, olardyŋ 19 myŋy alǧaş ret mektep tabaldyryǧyn attady. Sonymen qatar oqu jylynyŋ alǧaşqy toqsanynda taǧy bes jaŋa mektep paidalanuǧa berılmek.
Ūqsas jaŋalyqtar
