Mańǵystaý oblysynda naýryzdyń 22-sine deıin ulttyq qundylyqtardy dáriptep, rýhanı sanany jańǵyrtýǵa baǵyttalǵan túrli sharalar ótkiziledi,
Ár kún ár taqyrypqa arnalady. Shara barysynda ulttyq dástúrdi ulyqtaýǵa, qaıyrymdylyq jasaýǵa, qarttardy qadirlep, sport pen bilimdi damytýǵa den qoıylmaq.
Fatıma Bırkle - «Osetın» etnomádenı birlestiginiń tóraıymy. Ol óńirde ótkiziletin merekelik sharalarǵa únemi óz ultynyń kıimimen keledi. Birlestik tóraıymy oıýmen órnektelgen osetın kıimderiniń qazaqtyń ulttyq kıimderine qatty uqsaıtynyn aıtady.
«Kóılegim men shapanymdy kórgender «Qazaqtyń ulttyq kıimi me?» dep surap jatady. Joq, bul osetın ultynyń kıimi. Múmkin keıbir elementterin kezinde ata-babamyz qazaqtardan alǵan shyǵar, kıimderimizde uqsastyq bar. Bizdiń osetın qyz-kelinshekteriniń kóılekteriniń etegi de uzyn», - deıdi «Alan» osetın etnomádenı birlestiginiń tóraıymy Fatıma Bırkle.
Búgin «Dostyq» úıinde ulttyq kıimder kórmesi ótti. Aımaqtaǵy etnomádenı birlestik ókilderi balabaqsha búldirshinderi men mektep oqýshylaryna óz ultynyń dástúrli kıimderin, olardyń tarıhyn jáne erekshelikterin tanystyrdy.
«Bizdiń erteńimiz - búgingi bizdiń jastarymyz. Sol sebepti jastarǵa halyqtyń dostyǵyn nasıhattaý, bir-birine degen tózimdilikti ilgeriletý jáne jastarymyzǵa Naýryz merekesiniń mán-maǵynasyn túsindirý maqsatynda búgin osyndaı shara uıymdastyrdyq», - dedi «Qoǵamdyq kelisim» KMM dırektory Amangúl Jaıylhanova. Ulttyq kıimder kúnin óńirdegi barlyq ujym atap ótýde.
