ماڭعىستاۋ وبلىسىندا ناۋرىزدىڭ 22-سىنە دەيىن ۇلتتىق قۇندىلىقتاردى دارىپتەپ، رۋحاني سانانى جاڭعىرتۋعا باعىتتالعان ءتۇرلى شارالار وتكىزىلەدى،
ءار كۇن ءار تاقىرىپقا ارنالادى. شارا بارىسىندا ۇلتتىق ءداستۇردى ۇلىقتاۋعا، قايىرىمدىلىق جاساۋعا، قارتتاردى قادىرلەپ، سپورت پەن ءبىلىمدى دامىتۋعا دەن قويىلماق.
فاتيما بيركلە - «وسەتين» ەتنومادەني بىرلەستىگىنىڭ ءتورايىمى. ول وڭىردە وتكىزىلەتىن مەرەكەلىك شارالارعا ۇنەمى ءوز ۇلتىنىڭ كيىمىمەن كەلەدى. بىرلەستىك ءتورايىمى ويۋمەن ورنەكتەلگەن وسەتين كيىمدەرىنىڭ قازاقتىڭ ۇلتتىق كيىمدەرىنە قاتتى ۇقسايتىنىن ايتادى.
«كويلەگىم مەن شاپانىمدى كورگەندەر «قازاقتىڭ ۇلتتىق كيىمى مە؟» دەپ سۇراپ جاتادى. جوق، بۇل وسەتين ۇلتىنىڭ كيىمى. مۇمكىن كەيبىر ەلەمەنتتەرىن كەزىندە اتا-بابامىز قازاقتاردان العان شىعار، كيىمدەرىمىزدە ۇقساستىق بار. ءبىزدىڭ وسەتين قىز-كەلىنشەكتەرىنىڭ كويلەكتەرىنىڭ ەتەگى دە ۇزىن»، - دەيدى «الان» وسەتين ەتنومادەني بىرلەستىگىنىڭ ءتورايىمى فاتيما بيركلە.
بۇگىن «دوستىق» ۇيىندە ۇلتتىق كيىمدەر كورمەسى ءوتتى. ايماقتاعى ەتنومادەني بىرلەستىك وكىلدەرى بالاباقشا بۇلدىرشىندەرى مەن مەكتەپ وقۋشىلارىنا ءوز ۇلتىنىڭ ءداستۇرلى كيىمدەرىن، ولاردىڭ تاريحىن جانە ەرەكشەلىكتەرىن تانىستىردى.
«ءبىزدىڭ ەرتەڭىمىز - بۇگىنگى ءبىزدىڭ جاستارىمىز. سول سەبەپتى جاستارعا حالىقتىڭ دوستىعىن ناسيحاتتاۋ، ءبىر-بىرىنە دەگەن توزىمدىلىكتى ىلگەرىلەتۋ جانە جاستارىمىزعا ناۋرىز مەرەكەسىنىڭ ءمان-ماعىناسىن ءتۇسىندىرۋ ماقساتىندا بۇگىن وسىنداي شارا ۇيىمداستىردىق»، - دەدى «قوعامدىق كەلىسىم» كمم ديرەكتورى امانگۇل جايىلحانوۆا. ۇلتتىق كيىمدەر كۇنىن وڭىردەگى بارلىق ۇجىم اتاپ وتۋدە.
