JERUIYQTYŃ JIGITI

2023
Adyrna.kz Telegram

(Alaqandaı esse)

Bekjan... Izetti ini, áleýetti áriptes, senimdi serik... Birge qyzmet istedik. Jumysqa jaıly. Týmysynan mámileger. Terisine syımaı ashýlanyp, attandap kele jatqan adamdy áp-sátte sabasyna túsirip, qoıdaı jýasytady. Qaıyrymdy. Eshkimniń kóńilin qımaıdy. Saparǵa shyǵarda sál jalǵyzsyraǵanyńdy sezse, búkil sharýasyn tastap, jer túbine deıin ilesip júre beredi. Oqymaǵan kitaby joq. Biraq óziniń kitabyn shyǵarýǵa qoly tıer emes. Kitap demekshi, týyp-ósken jeri - Qarmaqshydaǵy jyraýlar aýyly týraly derek jınap júrgenine kó-ó-óp jyl ótti. Kitabynyń atyn baıaǵyda-aq qoıyp qoıǵan. "Jyrdyń Jeruıyǵy". Myna sýrette sol kitapty jazaıyn dep shabyt shaqyryp otyrǵan sáti...

Shyǵarmashylyq qabiletinde min joq. Qara sózge de, óleń sózge de ıkemdi. Tek eptegen serilik, azdaǵan perilik, kisi kóńilin qımastyq, jurtpen jappaı syılastyq ony ústeldiń ústinen únemi julyp alyp, alys kókjıekterge aýyq-aýyq shaqyrady da turady. Munan soń "Jyrdyń Jeruıyǵy" ońaılyqpen bite me?! Biraq jazady áli ol sol dúnıeni. Qara da tur, "Bekjan kitap jazǵan jer" dep qýanatyn bolamyz biz...
Sózge óte júırik. Qaljyńy qıǵash ketpeıdi. Biraq sol myqtyńnyń ózin de ádemi ázilimen qamshylap ótetinder tabylyp qalady.

Birde jumys babyndaǵy jıynǵa Elerke degen qyzmetkerimizdi shaqyrýǵa Bekjandy jumsadyq. Bekjan Elerkeniń bólmesine jetem degenshe, onyń atyn umytyp qalypty. Esikti ashyp, "Elarna degen qaısyńyz edi, dereý jınalysqa baryńyz", - depti. Sonda sóz qadirin biletin Elerke Bekjanǵa: "Áıteýir, "Habar" demegenińizge shúkir, aǵa!", - depti ádeppen ǵana... Ońbaı tústi ǵoı bizdiń Bekjan sonda...
Sol Bekjan, seri Bekjan, júırik jýrnalıst, kúıli kásipker, "Jyrdyń Jeruıyǵy" degen jazylmaǵan kitaptyń avtory Bekjan Súleımenov búgin erdiń jasy - elý úshke tolypty. Qutty bolsyn!

Baýyrjan OMARULY

Pikirler