"Anam Sholpan Baıtursynqyzy kóringenniń jer tólesinde kún keshti" - A. Baıtursynovtyń urpaǵy baspanaly boldy

5860
Adyrna.kz Telegram
Qazaqtyń uly aǵartýshysy ári Alash qaıratkeri Ahmet Baıtursynulynyń jıen nemeresi, tektiniń urpaǵy Aıman Baısalova egde tartqan shaǵynda baspanaly boldy. Ahań urpaǵynyń Almatydan páter alýyna alashtanýshy ǵalym Aıgúl Ismaqova bas bolyp, senator Altynbek Nuquly usynysqa qoldaý tanytqan. Bul jaıly "Adyrna" ulttyq portaly habarlady. 
- Allaǵa shúkir, búgin qasıetti dúısenbi kúni Almatyda keremet jańalyq boldy. Prezıdent Q.K. Toqaevtyń qoldaýymen Aqymet Atanyń jıen nemeresi Aıman apaıymyz jańa úı aldy. “Alǵash ret jańa baspanaǵa” kirdim deıdi apaı kózine jas irkile. Máseleni kótergen Aıgúl Ismaqova apaıyma, maqala jarııalaǵan “Egemen Qazaqstan” gazetine, problemaǵa beı-jaı qaramaı, árqashan óz kómegin usynǵan senator Altynbek Nuqulyna Allanyń nury jaýsyn, - degen qýanyshty jańalyqty qazaqtyń ǵalym qyzy Anar Bekmyrza habarlady.
Buǵan Aıman Baısalovanyń ózi:

 "Atam Ahmet Baıtursynulynyń ózine tıesili úıi eshqashan bolmaǵan, Anam Sholpan Baıtursynqyzy kóringenniń bosaǵasynda, keıde jer tólesinde qýǵyn-súrginde ómir keshti. Aınalaıyn Prezıdent Qasym-Jomart Kemeluly maǵan búgin sý jańa, jyly úı syılady. Atanyń árýaǵyn syılap, meniń basymdaǵy jaǵdaıǵa alańdap, qamqorlyq tanytqanyńa raqmet. Alash jolyn ardaq tutqan eldiń bolashaǵy zor dep senemin. Elime, Qazaq halqyna jarqyn bolashyq tileımin!" -dep alǵys bildirdi.

Aıman Baısalova - Ahmet Baıtursynulynyń tól jıeni. 1936 jyly týǵan. Qazirgi Ahmet Baıtursynuly mýzeı-úıinde 1 jyl 7 aıyna deıin naǵashysy atasy Ahmet pen ájesi Badrısafa, óziniń áke-sheshesimen birge turǵan. Ahańnyń jıeni ózin atasy moınyna mingizip, talaı erkeletip oınatqanyn aıtady. Ol týraly anasy Sholpan apamyz aıtyp bergen eken. Keıindeý, shamamen 1940 jyly sheshesi Sholpannyń jumysyna baılanysty Baqanasqa kóshken.

Aıman apamyz Ahmet Baıtursynulynyń jıeni ekenin, tek 1991 jyly bilgenin bylaısha esine aldy:

«Abaı dańǵyly men Masanchı kóshesiniń qılysyndaǵy temirjol aýrýhanasynda jumys isteýshi edim. Anam Sholpan kelip, jumystan surap alyp, Torǵaıǵa ushyp kettik. Sol kezde Amanqos, Ǵarıfolalar jas edi (Mekteptegi men Ánesti aıtyp otyr. – Red.). Ushaqta Tursynbek Kákishev te boldy. Men ol kezde olardyń birin de tanymaıtyn edim. Solaı tekti tulǵanyń urpaǵy ekenimizdi bildik», - dep kúrsindi apamyz.

"Adyrna" ulttyq portaly

Pikirler