Semeı qalasynda oqý proesine kedergi keltirip, muǵalimderdi kóshe sypyrýǵa jibergen. Shamasy, mundaı tapsyrmany qala ákiminiń orynbasary berip, osyndaı mazmundaǵy hat mektepterge taratylǵan. Bul týraly Bilim jáne ǵylym mınıstri Ashat Aımaǵambetov jelidegi paraqshasynda jazdy, dep habarlaıdy "Adyrna" ulttyq portaly.
- 2019 jyldyń jeltoqsanynda qabyldanǵan Zań sheńberinde pedagogterdi ózine tán emes fýnkııalarǵa tartýǵa tyıym salynady. Sodan beri muǵalimder tek tikeleı fýnkıonaldyq mindettermen aınalysýy kerek ekenin túsiný úshin ýaqyt jetkilikti boldy.Mundaı buzýshylyqtar úshin eki júzge jýyq basshy jazalandy. Olar tártiptik jáne ákimshilik jaýapkershilikke tartylyp, tipti jumystan shyǵaryldy. Semeı qalasyndaǵy oqıǵaǵa baılanysty bilim berý salasyndaǵy sapany qamtamasyz etý departamenti ákimshilik is qozǵap, tekserý júrgizilip jatyr. Qala ákimi orynbasarynyń bul jaǵdaıǵa qatystylyǵy rastalǵan jaǵdaıda, atalǵan laýazymdy tulǵa jáne ózge tulǵalar ákimshilik jaýapkershilikke tartylady. Biz sondaı-aq qajetti sharalar qabyldaý úshin Memlekettik qyzmet isteri agenttigine júginemiz. Sonymen qatar qalalyq bilim bóliminiń basshysy da jaýapkershilikke tartylady, - dep jazdy mınıstr jelide.
Eske sala keteıik, 16 qazan kúni Semeıdegi mektepte sabaqtardy toqtatyp, muǵalimderdi senbilikke shyǵarǵan. Qala turǵyny muǵalimderdiń kóshe sypyryp júrgenin sýretke túsirip, jergilikti basylymǵa jibergen bolatyn.
"Adyrna" ulttyq portaly
