Köz aldyŋyzǧa qazırgınıŋ mūǧalımın qalai elestetesız? Ol qandai boluy qajet? Älbette, būl tūrǧyda ärkımnıŋ qiialy ärtürlı şaryqtaidy.
Bırı alǧaşqy synyp jetekşısın köz aldyna elestetıp jatqan bolar, endı bırıne student kezdegı mūǧalımderınıŋ beinesı kölbeŋdep kelgen şyǧar. Rasymen de, «ūstazy jaqsynyŋ ūstamy jaqsy» degendei, kökjiegıŋdı keŋeitetın, maqsaty aiqyn, bılımı men bılıktılıgı ūştasqan mūǧalım kez kelgen oquşyǧa ülgı. Al eger ol, sonymen qatar, jas, eŋbekqor, ziialy bolyp jatsa, tıpten keremet.
Sondai mūǧalımderdıŋ bırı – Qaraǧandy qalasyndaǧy mektepterdıŋ bırınde aǧylşyn pänınen sabaq beretın Ädılet İsabekov.
Pedagogika ǧylymdarynyŋ kandidatymen otandyq bılım beru jüiesı turaly sūhbattasyp, balalarǧa qandai keŋes beretının sūraǧan edık.
Bolaşaq mamandyǧyn qaraǧandylyq jas mūǧalım AQŞ-ta oqyp jürgenınde-aq taŋdaǧan. Ol kezde 23 jasar Ädılet maqsatyna jetıp, alys Amerikaǧa magistraturaǧa tüsken. Alaida tropikalyq künge küiıp jata bermei, aldyna jaŋa maqsat qoiyp, tez arada şeşım qabyldau qajet bolǧan.
Kantri-Klabtaǧy jalaqysy mol jūmys, restorandyq biznes menedjmentındegı tabysty qyzmet… Älbette, Ädılet ūzaq oilandy. Onyŋ üstıne, kelısımşartty ūzartu turaly da ūsynys tüsıp, AQŞ-taǧy karerasy alǧa basyp tūrǧan edı. Alaida, Otanǧa degen süiıspenşılık Ädılettı elge jetelep tūrdy. Bügınde onyŋ 4 joǧary bılımı bar.
«Oqudy bıtırgen soŋ mūǧalım bolam dep şeştım. Sondyqtan, elge oralǧan soŋ bırden magistraturaǧa tüsıp, aǧylşyn pänınıŋ mūǧalımı degen diplomdy iemdendım. Oqyp jürıp, Qaraǧandydaǧy qazaq-türık liseiınde ūstazdyq ettım», – deidı būl turaly Ädılettıŋ özı.Bügınde Ädılettıŋ jasy 26-da. Oquşylarǧa sabaq berıp, bılımderın tolyqtyryp jür. Bala da adam taŋdai bıledı ǧoi, oquşylar da mūǧalımıne äbden üiır bolyp alǧan.
«Balany sabaqqa baulu qiyn emes. Eŋ bastysy, tılın taba bılu qajet. Äitpese, qabıletsız bala bolmaidy. Ärqaisysy öz aldyna daryndy, öz aldyna zeiındı. Menıŋ basty metodikam – balalardy tyŋdau, solardyŋ tılınde söilesu. Ūstazdardyŋ jūmysyndaǧy jalǧyz qiyndyq – qazaqstandyq bılım beru jüiesınde, bızdıŋ ǧana emes, bükıl älemde mūǧalımderdı tym qatty şektep tastaǧan. Al men kreativtı jaqsy köremın, tyŋ dünielerdı oilap tauyp, solardy oqu jüiesıne qosqandy ūnatamyn. Bıraq, keide şekteulerdıŋ kesırınen kreativ pen oqu jüiesın bailanystyru öte qiyn. Al balalar üşın oqudy qyzyqty etudıŋ joldary köp", - deidı Ädılet.Ädılettıŋ aituynşa, HHI ǧasyrdyŋ mūǧalımı bırınşı kezekte balalardy bılımge qyzyqtyra bılu kerek, al qalǧanyn oquşylardyŋ özderı qajetıne qarai üirenıp alady.
«Är sabaqqa jospar qūrǧanda bırınşı kezekte atmosferany joǧary qalypta ūstauǧa tyrysamyn. Sabaqtyŋ qarqynyn tüsırmeu qajet, qyzyqty etıp, är saǧatty bır-bırıne ūqsamaityndai erekşe etu kerek. Sonda balanyŋ bılımge degen qyzyǧuşylyǧy joǧalmaidy. Jalpy, HHI ǧasyrdyŋ mūǧalımıne qoiylar basty talap – balany sabaqqa qyzyqtyra bılu. Al qalǧanyn oquşynyŋ özı üirenıp alady. Öitkenı, qazırgı balalar öte zeiındı ärı qabılettı. Tez üirenedı. Eŋ bastysy, jalyqtyryp almau kerek. Tıl üiretıp, ädebietke bauli otyra olardyŋ boiyna meiırbandyqty, adaldyqty, raqymdylyqty sıŋırgım keledı. Adamnyŋ boiyndaǧy būl qasietter akademiialyq körsetkışterden de äldeqaida qūndy. Sonymen qatar, balalardy kıtap oquǧa baulu qajet. Barlyq oquşylarym klassikalyq kıtaptar oqidy. Klassikalyq kıtaptar oquşynyŋ damuyna jaqsy äser etedı», - deidı ol.Būdan bölek, Ädılet İsabekov bügınde PROF ME UP dep atalatyn onlain-kurstyŋ avtory.
«Būl kursta mamandyqty qalai taŋdau qajet, qalai ızdegen dūrys nemese ūnaǧan ısıŋmen ainalysu üşın ne ısteu kerek degen syndy äbden jauyr bolǧan mäselelerdı aitpaimyz. Mūnda mamandyqty taŋdauǧa degen jaŋa közqarastar turaly oi qozǧaimyz. Iаǧni, «A» nüktesın adaspai tauyp, «V» nüktesıne jaŋylmai barudyŋ barlyq joldaryn qarastyratyn navigatoryŋyz bolmaq».Avtordyŋ aituynşa, kurs mekteptıŋ joǧarǧy synyp oquşylaryna ǧana emes, studentterge de paidaly bolmaq.
«Jalpy, bolaşaǧyn qai salamen bailanystyrudy bılmei jürgenderge, mamandyq taŋdauda qatelesuden qorqatyndarǧa, ışkı düniesın damytqysy kelgenımen neden bastaryn bılmei jürgenderge arnalady», – deidı Ädılet.Ambisiiasy joǧary Ädılettıŋ aldaǧy josparlary da orasan. Onysyn jasyrmaidy da.
«Josparym öte köp. Qazır jaŋa bılım beru jüiesı jönınde joba daiyndap jatyrmyn. Aldaǧy uaqytta Bılım jäne ǧylym ministrlıgınde sättı qorǧaimyn dep oilaimyn. Jalpy, qazaqstandyq mektepterdıŋ äleuetı zor. Men sol äleuetın aşqym keledı», – dep sūhbatty aiaqtady Ädılet İsabekov.
Ūqsas jaŋalyqtar
