Almaty qalasynyń Áýezov aýdandyq soty belgili reseıshil Ermek Taıshybekovty 7 jylǵa túrmege japty. Qazaqstan sotynyń mundaı sheshim shyǵarǵanyna qoǵam kúmánmen, senimsiz qarap otyrǵan sııaqty. Bizde osy ýaqytqa deıin reseılik taraptyń sózin sóılep kelgenderdiń basynyń bir tal shashy da túspegeni belgili.
Taıshybekovtyń sottalǵanyna qazaqstandyqtardan góri reseılikter dúr silkindi. Ózderiniń aqparattyq quraldarynda ártúrli propagandany jasap otyrdy. Taıshybekov osy ýaqytqa deıin reseılik propagandany júrgizip, qazaq qoǵamynyń júıkesine tıip keldi. Al, Taıshybekovtyń advokaty Ǵalym Nurpeıisov Taıshybekovty «ultaralyq kıkiljiń týǵyzdy» degen bappen sottaýdyń esh negizi joq dep aqtap otyr.
Taıshybekov osyǵan deıin 2020 jyly qyrkúıek aıynda Qordaıdaǵy kóterilis boıynsha da ultaralyq kıkiljiń shyǵaryp, qolǵa túsken. 2020 jyldyń aqpan aıynda Qordaı isi boıynsha taǵy da qylmystyq jaýapkershilikke tartyldy.
Al, Qordaıdaǵy jaǵdaıdan ózderińizdiń habarlaryńyz bar. Jappaı tóbelesten 11 adam qaza tapty, 20 polıııa qyzmetkerleri ártúrli deńgeıde jaraqat aldy. 156 úı órtenip ketti, 102 kólik talqandaldy.
Al endi meniń tań qalyp otyrǵanym, reseılikterdiń Qazaqstanda orystildilerdiń quqy taptalyp jatyr dep dabyra qaqqan tusynda Qazaqstan soty nege Taıshybekovty qamap tastady? Qordaıdaǵy oqıǵa boıynsha sottalatyn adamdar sottalyp ketti. Al osy Qordaı oqıǵasyna qatysy bar basty fıgýra Taıshybekov nege dál qazir sottalyp otyr? Álde bul reseılikterdiń dabylynan keıin Qazaqstanda til jaıynda daý ýshyǵyp ketpesin dep, basty fıgýra etip Taıshybekovty jaba saldy ma?
Qazaq qoǵamynyń qazirgi kezde túısigi myqty. Bárin bilip, sezip otyrady. Biraq qazaq qoǵamy Taıshybekovtyń shynaıy túrmege toǵytylǵanyna kúmánmen qaraıdy. Men óz basym eldegi ultarazdyq kıkiljiń týdyratyn, reseıshil fıgýralardyń túrmegen toǵytylǵanyn qashanda qoldaımyn! Sizdiń pikirińiz qandaı?
Bekbolat QARJAN,
«Adyrna» ulttyq portaly
