الماتى قالاسىنىڭ اۋەزوۆ اۋداندىق سوتى بەلگىلى رەسەيشىل ەرمەك تايشىبەكوۆتى 7 جىلعا تۇرمەگە جاپتى. قازاقستان سوتىنىڭ مۇنداي شەشىم شىعارعانىنا قوعام كۇمانمەن، سەنىمسىز قاراپ وتىرعان سياقتى. بىزدە وسى ۋاقىتقا دەيىن رەسەيلىك تاراپتىڭ ءسوزىن سويلەپ كەلگەندەردىڭ باسىنىڭ ءبىر تال شاشى دا تۇسپەگەنى بەلگىلى.
تايشىبەكوۆتىڭ سوتتالعانىنا قازاقستاندىقتاردان گورى رەسەيلىكتەر ءدۇر سىلكىندى. وزدەرىنىڭ اقپاراتتىق قۇرالدارىندا ءارتۇرلى پروپاگاندانى جاساپ وتىردى. تايشىبەكوۆ وسى ۋاقىتقا دەيىن رەسەيلىك پروپاگاندانى جۇرگىزىپ، قازاق قوعامىنىڭ جۇيكەسىنە ءتيىپ كەلدى. ال، تايشىبەكوۆتىڭ ادۆوكاتى عالىم نۇرپەيىسوۆ تايشىبەكوۆتى «ۇلتارالىق كيكىلجىڭ تۋعىزدى» دەگەن باپپەن سوتتاۋدىڭ ەش نەگىزى جوق دەپ اقتاپ وتىر.
تايشىبەكوۆ وسىعان دەيىن 2020 جىلى قىركۇيەك ايىندا قوردايداعى كوتەرىلىس بويىنشا دا ۇلتارالىق كيكىلجىڭ شىعارىپ، قولعا تۇسكەن. 2020 جىلدىڭ اقپان ايىندا قورداي ءىسى بويىنشا تاعى دا قىلمىستىق جاۋاپكەرشىلىككە تارتىلدى.
ال، قوردايداعى جاعدايدان وزدەرىڭىزدىڭ حابارلارىڭىز بار. جاپپاي توبەلەستەن 11 ادام قازا تاپتى، 20 پوليتسيا قىزمەتكەرلەرى ءارتۇرلى دەڭگەيدە جاراقات الدى. 156 ءۇي ورتەنىپ كەتتى، 102 كولىك تالقاندالدى.
ال ەندى مەنىڭ تاڭ قالىپ وتىرعانىم، رەسەيلىكتەردىڭ قازاقستاندا ورىستىلدىلەردىڭ قۇقى تاپتالىپ جاتىر دەپ دابىرا قاققان تۇسىندا قازاقستان سوتى نەگە تايشىبەكوۆتى قاماپ تاستادى؟ قوردايداعى وقيعا بويىنشا سوتتالاتىن ادامدار سوتتالىپ كەتتى. ال وسى قورداي وقيعاسىنا قاتىسى بار باستى فيگۋرا تايشىبەكوۆ نەگە ءدال قازىر سوتتالىپ وتىر؟ الدە بۇل رەسەيلىكتەردىڭ دابىلىنان كەيىن قازاقستاندا ءتىل جايىندا داۋ ۋشىعىپ كەتپەسىن دەپ، باستى فيگۋرا ەتىپ تايشىبەكوۆتى جابا سالدى ما؟
قازاق قوعامىنىڭ قازىرگى كەزدە تۇيسىگى مىقتى. ءبارىن ءبىلىپ، سەزىپ وتىرادى. بىراق قازاق قوعامى تايشىبەكوۆتىڭ شىنايى تۇرمەگە توعىتىلعانىنا كۇمانمەن قارايدى. مەن ءوز باسىم ەلدەگى ۇلتارازدىق كيكىلجىڭ تۋدىراتىن، رەسەيشىل فيگۋرالاردىڭ تۇرمەگەن توعىتىلعانىن قاشاندا قولدايمىن! ءسىزدىڭ پىكىرىڭىز قانداي؟
بەكبولات قارجان،
«ادىرنا» ۇلتتىق پورتالى
