Tursynbekti jaqtaýshy kompanııanyń adamdary mynadaı saıası lozýngi shyǵarypty:
«Súringendi, búlingendi sóz etpe,
Men de turmyn, sen de tursyń kezekte»
Mynaý shýmaqtyń astaryna úńilseńiz, men de, sen de qylmys jasaýǵa kezek kútip otyrmyz degenge keledi eken. Biraq, osy lozýngti aıtyp otyrǵandar qoǵam men halyqty ádilet izdeme, jemqorlyqqa kóz juma qara, aq pen qarany ajyratpa, erteń seniń de basyńa osy keledi dep basyp otyrǵan sııaqty. Qazaq ańqaý ǵoı, sene salady.
Qazir Tursynbektiń jaqtaýshylary kóbeıdi. Olardyń qatarynda ánshiler kósh bastady. Qazaq qoǵamy sońǵy 30 jyldyń ishinde ánshilerden (bári emes) eshbir jaqsylyq kórgen joq. Qoǵamdy, jastardy ózderiniń jeke bas tirlikterimen, jyltyraqtarymen rýhanı regresske ushyratqan da osy ánshiler boldy.
Odan keıingi sapta jalǵan bloggerler toqtaýsyz jumys istep jatyr. Bulardyń da qatary tym kóp. Soǵan qaraǵanda tym kóp aqsha jumsalyp jatqan sııaqty.
Al, úshinshi qatarda qoǵamnyń ishindegi «kóp aıtsa kóndi, jurt aıtsa boldy» degenge shapqylaıtyn toǵyshar tobyrlar tur. Eń qaýipti tendenııany da, qoǵamdy ońdyrmaı jiberetin de osy toǵyshar tobyrlar bolyp tur.
Osynyń bárin oılaı kele, bizdiń qoǵam zań ústemdik qurǵan júıede eshqashan da ómir súre almaıdy degen qorytyndyǵa keldim. Sebebi, qoǵamnyń ózi jemqorlyqqa ábden úırengen. Sybaılastyqtyń talaı túrine bara alady bizdiń qoǵam. Sharýasyn tek ońaı jolmen sheship ketýge eti ólip ketken. Eger de bizde zań kúshti ústemdik qursa, onda qazaq qoǵamynyń ómir súrýi qıyndap salady dep oılaı berińiz.
Tursynbektiń sózin japyryla, aqtaryla sóılep jatqan toǵyshar tobyrlar testke kirip, qosaq arasynda ketken qarshadaı qyzǵa qııanat jasalmasyn dep bir de bir daýys kótergen joq. Sol qyzdyń taǵdyry, erteńi ne bolsa ol bolsyn, bularǵa Tursynbek jaýapqa tartylmaı, sytylyp shyǵyp ketse boldy. Qarshadaı ǵana qyz erikkennen barǵan joq bul tirlikke. Ony da turmystyń kúıbeńi jep bara jatqandyqtan bardy. Ol qyzdy da men aqtamaımyn. Tek qana Tursynbek dep ólip-talyp jatqan tobyrlardyń qarshadaı qyzǵa bir sát janashyrlyq jasap, arasha suramaýy – bulardyń essiz, bassyz, qulqynynan asa almaıtyn zulym, jaǵympaz ekeniniń anyq kórinisi.
Jemqorlardy aqtap, paraqorlyqqa barmaq basty, kóz qystymen qarap otyrǵan qoǵamnyń qazirgi syıqy osy.
Bekbolat QARJAN,
"Adyrna" ulttyq portaly
