Bırıkken Ūlttar Ūiymy Livan, Gaza sektory jäne Iemendegı gumanitarlyq ahualdyŋ kürt naşarlap bara jatqany turaly aqparat taratty, dep habarlaidy "Adyrna" ūlttyq portaly.
Ūiymnyŋ deregınşe, öŋırlerde milliondaǧan adam azyq-tülık pen medisinalyq kömekke mūqtaj bolyp otyr.
BŪŪ Bas hatşysy Antoniu Guterriş AQŞ pen İran arasyndaǧy şielenıstıŋ küşeiuıne jäne öŋırdegı tūraqsyzdyqtyŋ artuyna alaŋdauşylyq bıldırdı. Onyŋ aituynşa, qaruly qaqtyǧystar saldarynan beibıt tūrǧyndar zardap şegıp, gumanitarlyq jaǧdai kürdelene tüsken.
Guterriş taraptardy sabyr saqtauǧa jäne jaǧdaidyŋ odan ärı uşyǧuyna jol bermeuge şaqyrdy. Sonymen qatar halyqaralyq gumanitarlyq qūqyq normalaryn saqtaudyŋ maŋyzyn atap öttı.
BŪŪ mälımetınşe, İzrail armiiasynyŋ evakuasiia turaly būiryǧynan keiın Beiruttıŋ oŋtüstık audandarynan şamamen 200 myŋ adam köşıp ketken. Qazırgı uaqytta 135 myŋǧa juyq adam uaqytşa ornalastyru ortalyqtarynda tırkelgen. Alaida ortalyqtardyŋ köpşılıgı lyq tolǧandyqtan, myŋdaǧan tūrǧyn aşyq aspan astynda tüneuge mäjbür.
Livan densaulyq saqtau ministrlıgınıŋ mälımetıne säikes, soŋǧy äue şabuyldary saldarynan bes adam qaza tauyp, 48 adam jaralanǧan. Zardap şekkenderdıŋ arasynda medisina qyzmetkerlerı de bar.
Al gaza sektorynda gumanitarlyq jükterdı jetkızu jūmystary qiyndyqtarǧa ūşyrap otyr. «Kerem-Şalom» ötkızu beketındegı kıdırısterge bailanysty auruhanalar men su tūşylandyru qondyrǧylaryna arnalǧan janarmai jetkızılmegen. Soǧan qaramastan halyqaralyq ūiymdar aimaqqa därı-därmek, gigienalyq qūraldar, şatyrlar men körpeler tielgen myŋnan astam jük konteinerın jetkızgen.
Düniejüzılık densaulyq saqtau ūiymynyŋ qoldauymen soŋǧy ekı aptada Gazadan şetelde emdeluge mūqtaj jüzge juyq nauqas evakuasiialanǧan. Alaida myŋdaǧan adam älı de mamandandyrylǧan medisinalyq kömekke zäru.
BŪŪ Iemendegı azyq-tülık daǧdarysynyŋ da tereŋdep bara jatqanyn habarlady. Ūiymnyŋ baǧalauynşa, eldıŋ ükımet baqylauyndaǧy aumaqtarynda şamamen bes million adam azyq-tülık tapşylyǧynan zardap şegıp otyr.
Mausym men qyrküiek aralyǧynda būl körsetkış 5,4 million adamǧa deiın ösuı mümkın.
BŪŪ agenttıkterı halyqaralyq qauymdastyqty şūǧyl qarjylai qoldau körsetuge şaqyrdy. Ūiym 2026 jylǧa arnalǧan gumanitarlyq jospar aiasynda Iemendegı 12 million tūrǧynǧa kömek körsetu üşın 2,16 milliard dollar kölemınde qarjy qajet ekenın mälımdedı.
