Áleýmettik jelide qazaq aýyldaryna tán "balalap, tamyryn keńge jaıyp" ketken máseleni ashyq, kesip aıtqan azamatqa qatysty vıdeo jaryq kórdi. Qaraǵandy oblysy, Buqar jyraý aýdany, Tuzdy mekeniniń turǵyny aýyldyqtardyń "moınyna minbelegen" máselelerdi jaıyp salyp, shendilerdi sastyrdy, dep habarlaıdy "Adyrna" ulttyq portaly.
Aýyldaǵy mal sharshashylyǵy men egin sharýashylyǵyna qatysty keleńsizdikterdi, jer máselesi men jerdi "basyp alǵan" jýandardyń áreketi sóz boldy. Qoǵam belsendisi Aısultan Jaqypov mundaı vıdeony halyqqa kórsetýden shendilerdiń ózi taısaqtap, basyn ala qashatynyn jazady:
- Negizi shynaıy jaǵdaı osyndaı. Kandıdattar ádemi sóılegendi ǵana jarııalaıdy kóbine. Biraq, bul vıdeony da kandıdattyń shtabyndaǵy jigitterdiń paraqshasynan aldym. Jarnamasy men PR az kandıdat eken. Vıdeodaǵy azamat Qaraǵandynyń 18 okrýgine qarasty aýylynyń turǵyny. Jazdaı Buqar jyraý, Osokarovka aýyldaryn aralap baqqanmyn. Buzaý eginge tússe qamap qoıatyndar bar eken. Shyǵaryp alý úshin tórt myń teńge beresiń. "Buzaý aýyldyń mańynda jaıylmaýshy ma edi" dersizder. Keı aýyldardan eki júz metr uzamaı jatyp egis alqaby bastalady.Aq-sur kúrteli partııa osyndaı jerlerdi qaıtarýǵa jumys isteýi kerek. Aıdaladaǵy jerlerdi qaıtaryp alǵanymen aýyl turǵyndaryna paıdasy joq bolýy da múmkin...Jazdaı jazyp ta, aıtyp ta baqtyq. Tipti, aýyldardan vıdeo da túsirdim... - dedi qoǵam belsendisi.
Vıdeony kórgen oqyrmandar aýyl turǵynyn qostap, qoldap ketti. Olardyń aıtýynsha, bul Qazaq elindegi barlyq aýyldarǵa tańsyq emes jaıt.
"Zań boıynsha jer ıesi alqabyn mal ótpeıtindeı qorshap alýǵa mindetti. Eger qorshalmaǵan bolsa, erkin jaıyla bersin. Malyńdy qamaýǵa quqy joq! Qamasa - onda sotqa berýińe bolady";
"Qaraǵandy oblysynda mal jáıilimi defııt. Keıbir aýdandarda shabyndyq alqaptar múldem joq deýge bolady. Ákim qaralar qarapaıym qazaqqa buıyrmasyn dep tanys tamyrlaryna artqy esikten berip jibergen. Halyqqa tıesili jerler bir tyshqaq laǵy joq dókeılerge qyzmet jasap jatyr";
"Jer aýyldan 5km qashyqta bolýy shart...";
"Bul barlyq jerde óte mańyzdy másele " dep ashyndy oqyrman qaýym.
"Adyrna" ulttyq portaly
