Shymkent qalasynda «Eńbek» memlekettik baǵdarlamasynyń II baǵyty sheńberinde jappaı kásipkerlikti damytý isi sátti júzege asyrylyp keledi.Bul kásippen aınalysamyn degen jergilikti turǵyndar úshin úlken múmkindik.
Memlekettik qoldaýdyń arqasynda bıznes ıdeıasyn júzege asyryp, jańadan kásip ashqandardyń biri – Janna Berkimbaeva.
Ol byltyrǵy jyldyń qyrkúıek aıynda «kosmetologııa» baǵyty boıynsha komıssııaǵa óz bıznes-josparyn usynǵan. Nátıjesinde jobasy maquldanyp, 200 AEK(555 650 tg) kóleminde grantqa qol jetkizdi.
- Byltyr «Atameken» palatasy janyndaǵy «Bıznes bastaý» kýrsyna qatystym. Qolyma sertıfıkat alǵan soń, memlekettik grantqa qujat tapsyrdym. Memlekettik qoldaýdyń arqasynda óz isimizdi bastadyq. Qazirgi tańda kosmetologııa kabınetinde bet tazartý, qasty túzetý, boıaý jáne t.b. baǵyttar boıynsha qyzmetter kórsetemin-deıdi kásipker.
Jalpy, Shymkentte byltyr 4828 adam memlekettik grantqa qol jetkizdi. Onyń ishinde 407-si kóp balaly otbasy múshelerine, 2122 -az qamtamasyz etilgen otbasylarǵa, 29-múgedek azamattarǵa ,1075-si jastarǵa jáne 1195 ózge sanattaǵylarǵa berildi. Bıyl 600 azamat grantqa qol jetkizip, óz múmkindikterin júzege asyrýda.
Shymkent qalasy ákimdiginiń baspasóz qyzmeti
