Meniń ultym hakas. Ókinishke qaraı, qazir bizdiń sanymyz respýblıkada 12 paıyzdan áreń asady. Hakasııa deıtin respýblıkamyz bar.
Áıteýir, áýpirimdep júrip jatyrmyz. Orys bıliginiń ozbyrlyǵy týraly jazyp jatqandaryńyzdyń bári ras. Tipti, odan da soraqy desem bolady. Mysaly, Hakasııanyń úkimetinde birde-bir hakas joq. Bári syrttan kelgender. Olardy «qaıdaǵy bir aborıgenderdiń» problemasy qyzyqtyrmaıtyny anyq. Bar oıy - tabıǵı baılyqty tonap, baıyp alý, boldy. Osy jaqynda altyn óndirýshiler Belyı Iıýs (Aq Is) deıtin kólimizdi ýlap tastady. Jerlik halyqtyń bul jerdegi eń úlken problemasy – jeke menshik kómir kompanııalary. Olar qazir hakastar turyp jatqan Qoıbal dalasyn asty-ústine shyǵaryp qurtyp jatyr. Biz azbyz. Bul jer bizdiń tamyrymyz, ósip-óngen ortamyz. Olardy joıyp jatyr, biz de jutylyp baramyz. Árıne, qoldan kelgenshe kúresip baǵyp jatyrmyz. Bılik te, sot ta, prokýror da syrttan kelgender. Olar bizdi qorǵaýdyń ornyna syrttan kelgen týra sondaı kompanııalarmen aýyz jalasyp ketip jatqanda, ne isteı alamyz? Dál osy kompanııalar Kýzbasta taǵy bir túrik halqy - shor halqynyń aýylyn qurtyp jiberdi. Jazatyn nárse kóp. Qaısybirin jazaıyn?! Biraq qazir bizdi alańdatyp otyrǵan eń basty másele – osy kómir kompanııalary.
Árıne, siz basqa eldiń azamatysyz. Bizdiń problemamyzdy sheship bere almassyz. Biraq ony jazyp, janaıqaıymyzdy búkil álemge jetkize alasyz. Sizder sııaqty týystarymyz bolmasa, bizdi myna jaqta tyńdaıyn dep turǵan joq..
Jolymbet Mákish
