Respýblıkanyń eń iri ónerkásiptik ortalyqtarynyń biri bolyp tabylatyn Shymkent qalasynda osy jyldyń tórt aıynda 243,3 mlrd. teńgeniń ónimi óndirildi. Al, ónerkásip salasynda úlesi 84,4 paıyzdy quraıtyn óńdeý ónerkásibiniń kólemi 205,4 mlrd. teńgeni qurap, ótken jyldyń sáıkes kezeńimen salystyrǵanda 14,4 paıyzǵa artty. Bul kórsetkishpen qalamyz elimiz boıynsha alǵashqy bestikke kirip otyr.
Qaladaǵy óńdeý ónerkásibiniń birqatar salalarynda ósý dınamıkasyn baıqaýǵa bolady. Mysaly, hımııa ónerkásibi 2,4 ese, farmaevtıka ónerkásibi 31%-ǵa, jeńil ónerkásibi 34,1%-ǵa, tamaq ónerkásibi 15%-ǵa, ózge metall emes mıneraldyq ónimderdi óndirý 11%-ǵa jáne metallýrgııa 2,2%-ǵa ósken.
Jalpy Shymkent qalasynyń óńdeý ónerkásibin damytý maqsatynda qala aýmaǵynan úsh ındýstrıaldy aımaq qurylýda. Olardyń biri 306 gektar jerdi alyp jatqan «Juldyz» ındýstrıaldy aımaǵy. Bul aımaqta qurylys, metallýrgııa, farmaevtıka, jıhaz ónerkásibi damıtyn bolady. Sonymen qatar, eki agro-ındýstrıaldy aımaq iske qosylady. Onda 28 joba men bıologııalyq qospalary bar qunarly qurama jem óndirisi jáne sút óndirý zaýyty boı kóteredi.
Bolashaqta Shymkent qalasy ózinde jáne kórshi oblystarda óndiriletin aýyl sharýashylyǵy ónimderin tereń óńdeý baǵytynda damý kózdelýde.
Aıta keteıik, qalada ónerkásip salasynda 704 kásiporyn belsendi jumys jasaýda, onyń 26 iri jáne 47 orta kásiporyndar. Onda 32 myńnan astam adam jumys jasaıdy.
Shymkent qalasy ákimdiginiń baspasóz qyzmeti
