Balalar kitaphanasyndaǵy qaıyrymdylyq

2975
Adyrna.kz Telegram

Ananyń ystyq alaqany men meıirlene aıtqan «aınalaıyn, qulynshaǵym» degen jyly sózin estimegen kúıi qanshama bala eseıip, ómirdegi óz oryndaryn taýyp jatyr deseńshi...

Jýyrda balalar úıinde tárbıelenip jatqan jas jetkinshekterdi kózben kórip, kóńilderine sál de bolsa qýanysh dánin sebepsek degen nıetpen Almaty qalasy Ortalyqtandyrylǵan kitaphanalar júıesi I.A.Krylov atyndaǵy qalalyq balalar kitaphanasynyń ujymymen birge Naýryzbaı aýdany Aqjar aýylynda ornalasqan áleýmettik baǵyttaǵy «Aq Úmit» balalar úıine barǵan edik. Munda ul-qyzyn qosqanda 40 bala bar eken. Kitaphana ujymy balalarǵa óleń oqytyp, án salǵyzyp, túrli oıyndar oınatyp jatty. Balalardyń kóńil-kúıleri kóterilip, máz bolysyp jatyr. Osy aralyqta eresekteý kelgen Qaısar esimdi azamatty sózge tarttyq.

dsc02079

–Balalardyń úlkeni men. Jasym on altyda. Almaty Memlekettik energetıka jáne elektrondy tehnologııalar kolledjinde memlekettik grantpen oqımyn. Munda bárimiz bir úıdiń balasyndaı tatý-tátti turamyz. Jazǵy demalys kezinde keıbir balalardy týystary alyp ketedi. Men osynda qalǵandarǵa bas-kóz bolyp júremin – deıdi ol. Qaısardyń sózine, júris-turysyna qarap, jaqsy azamat bolyp qalyptasyp kele jatqanyna ishteı qýanyp qaldyq.

Munda orys ultynyń balary da bar eken. Báriniń de tilderi jatyq. Qazaqsha saırap júr. Birge turyp, birge oınaǵan soń, ortasyna beıimdelip ketetinin bilsek te, mundaı balalardan qalaı aınalmaısyń?! Qoshtasar aldynda barlyq balaǵa syılyq úlestirildi. Olar «taǵy da kelińizder!» dep, shýlap qala berdi.

dsc02091

Qazirgi kezde memleketimiz balalar úıiniń jaǵdaıyn jaqsartýǵa, olardyń bilimdi, tárbıeli bolyp qalyptasýyna shama-sharqynsha kóńil bólip keledi. Bilim jáne ǵylym mınıstrliginiń baspasóz qyzmetiniń málimetinshe, elimizde 140 balalar úıi bar eken. Olarda 7236 bala tárbıelenip jatyr. Biz bas suqqan balalar úıiniń jaı-kúıi jaqsy ekeni kórer kózge kórinip turdy. Arnaıy demeýshileri bar kórinedi. «Aq Úmit» basshylyǵy balalardy mereke kúnderi demalys oryndaryna aparyp turatynyn  aıtty. Oǵan qosa, bizge esimderin jarııalamaýdy da ótindi. Qaıyrymdylyq jasaý úshin qyrýar aqsha emes, yqylasyń bolsa jetkilikti bolatynyna kóz jetkizdik.


Jasulan NAÝRYZÁLI

 

 

Pikirler