4 jasqa deıingi balalarǵa arnalǵan
– Kólsaı degen osy jer me, ata?
– Iá!
– Sýrettegiden de kúshti eken ǵoı, – dedi segizdegi Darıǵa jan-jaǵyna qarap. Onyń úıinde osy kólderdiń súgireti ilýli tur. Ara-tura kóz tastap, armanǵa beriledi. Qyz jazǵy demalysty asyǵa kútti. Óıtkeni, atasynyń «Kólsaıdy kórsetemin» degen ýádesi bar-tuǵyn. Endi mine, ol taý basynda tóńirekti barlap tur. Jol boıy osy óńirdi zertteýmen boldy. Tamasha ólkege tabany tıgende tańdanysyn jasyra almady. Kóńildi júrdi. Atasy gıd jaldady. Ol ekeýin kólikpen arly-berli aralatty. Óńirmen tanystyrdy. Atasy men Darıǵa qaıyqqa otyrdy. Qymyz ishti. Taza aýada tamaq jedi. Kıiz úıde qondy. Sýretke tústi. Jaqsy demaldy.
– Kólsaı týraly aıtyp berińizshi, – dedi qyz.
– Bu jerdi bir kórgen adam taǵy da kelgisi kep turady. Sulýlyq tunǵan tabıǵat syıyna tamsanýmen bolasyń. Kózdiń jaýyn alǵan Kólsaı kólderi – Kúngeı Alataýynyń Kúrmeti men Saty asýlarynan bastaý alatyn kishigirim ózender sýynan paıda bolǵan 3 kól. Bular Joǵarǵy Kólsaı, Orta Kólsaı jáne Tómengi Kólsaı bop bólinedi. Kólsaı kólderiniń tabıǵaty tamasha. Ásem. Asqaq taýdyń ortasynda ornalasqan. Onyń tóńiregin shyraıly shyrsha, qalyń qaraǵaı, qasqaıǵan qaıyń kómkergen. Munda sheten, tańqýraı, barbarıs, qoı qaraqat, bóriqaraqat, ıtmuryn, shyrǵanaq, qoı búldirgen, raýǵash, jabaıy pııaz, sarymsaq, jupargúl, ýqorǵasyn, tomar dári, qalaqaı, myńtamyr, jalbyz, ógeıshóp, qylqan japyraq sekildi túrli jemis-jıdek, ósimdikter ósedi. Jan-janýardyń 200-den asa túri bar, – dedi gıd bilgenimen bólisip. Darıǵa kórgen-túıgenin qoıyn dápterine túrtip júrdi.
– Eh-h-h-h! Talaı tarıhty qoınaýyna búkken Kólsaı ǵoı, bul, – dedi atasy kúrsinip. Ekeýi aman-esen úıge oraldy. Jańa oqý jyly bastalǵanda Darıǵa «Jazǵy demalysty qalaı ótkizdiń?» taqyrybynda «Kólsaıdaǵy kóńildi keshter» atty áserli shyǵarma jazdy. Muǵalimi rıza boldy. Endigide, dostaryn da alyp baratyn bop sheshti.
Foto ashyq derekkózden alyndy
Qazaqstan Jazýshylar odaǵynyń
múshesi, jazýshy-dramatýrg,
ádebıettanýshy, synshy Álibek BAIBOL.
Áńgime aýdarmashynyń ruqsatymen jarııalandy.
Avtorlyq quqyq saqtalǵandyqtan kóshirip basýǵa bolmaıdy!
