انانىڭ ىستىق الاقانى مەن مەيىرلەنە ايتقان «اينالايىن، قۇلىنشاعىم» دەگەن جىلى ءسوزىن ەستىمەگەن كۇيى قانشاما بالا ەسەيىپ، ومىردەگى ءوز ورىندارىن تاۋىپ جاتىر دەسەڭشى...
جۋىردا بالالار ۇيىندە تاربيەلەنىپ جاتقان جاس جەتكىنشەكتەردى كوزبەن كورىپ، كوڭىلدەرىنە ءسال دە بولسا قۋانىش ءدانىن سەبەپسەك دەگەن نيەتپەن الماتى قالاسى ورتالىقتاندىرىلعان كىتاپحانالار جۇيەسى ي.ا.كرىلوۆ اتىنداعى قالالىق بالالار كىتاپحاناسىنىڭ ۇجىمىمەن بىرگە ناۋرىزباي اۋدانى اقجار اۋىلىندا ورنالاسقان الەۋمەتتىك باعىتتاعى «اق ءۇمىت» بالالار ۇيىنە بارعان ەدىك. مۇندا ۇل-قىزىن قوسقاندا 40 بالا بار ەكەن. كىتاپحانا ۇجىمى بالالارعا ولەڭ وقىتىپ، ءان سالعىزىپ، ءتۇرلى ويىندار ويناتىپ جاتتى. بالالاردىڭ كوڭىل-كۇيلەرى كوتەرىلىپ، ءماز بولىسىپ جاتىر. وسى ارالىقتا ەرەسەكتەۋ كەلگەن قايسار ەسىمدى ازاماتتى سوزگە تارتتىق.
–بالالاردىڭ ۇلكەنى مەن. جاسىم ون التىدا. الماتى مەملەكەتتىك ەنەرگەتيكا جانە ەلەكتروندى تەحنولوگيالار كوللەدجىندە مەملەكەتتىك گرانتپەن وقيمىن. مۇندا ءبارىمىز ءبىر ءۇيدىڭ بالاسىنداي تاتۋ-ءتاتتى تۇرامىز. جازعى دەمالىس كەزىندە كەيبىر بالالاردى تۋىستارى الىپ كەتەدى. مەن وسىندا قالعاندارعا باس-كوز بولىپ جۇرەمىن – دەيدى ول. قايساردىڭ سوزىنە، ءجۇرىس-تۇرىسىنا قاراپ، جاقسى ازامات بولىپ قالىپتاسىپ كەلە جاتقانىنا ىشتەي قۋانىپ قالدىق.
مۇندا ورىس ۇلتىنىڭ بالارى دا بار ەكەن. ءبارىنىڭ دە تىلدەرى جاتىق. قازاقشا سايراپ ءجۇر. بىرگە تۇرىپ، بىرگە ويناعان سوڭ، ورتاسىنا بەيىمدەلىپ كەتەتىنىن بىلسەك تە، مۇنداي بالالاردان قالاي اينالمايسىڭ؟! قوشتاسار الدىندا بارلىق بالاعا سىيلىق ۇلەستىرىلدى. ولار «تاعى دا كەلىڭىزدەر!» دەپ، شۋلاپ قالا بەردى.
قازىرگى كەزدە مەملەكەتىمىز بالالار ءۇيىنىڭ جاعدايىن جاقسارتۋعا، ولاردىڭ ءبىلىمدى، تاربيەلى بولىپ قالىپتاسۋىنا شاما-شارقىنشا كوڭىل ءبولىپ كەلەدى. ءبىلىم جانە عىلىم مينيسترلىگىنىڭ ءباسپاسوز قىزمەتىنىڭ مالىمەتىنشە، ەلىمىزدە 140 بالالار ءۇيى بار ەكەن. ولاردا 7236 بالا تاربيەلەنىپ جاتىر. ءبىز باس سۇققان بالالار ءۇيىنىڭ جاي-كۇيى جاقسى ەكەنى كورەر كوزگە كورىنىپ تۇردى. ارنايى دەمەۋشىلەرى بار كورىنەدى. «اق ءۇمىت» باسشىلىعى بالالاردى مەرەكە كۇندەرى دەمالىس ورىندارىنا اپارىپ تۇراتىنىن ايتتى. وعان قوسا، بىزگە ەسىمدەرىن جاريالاماۋدى دا ءوتىندى. قايىرىمدىلىق جاساۋ ءۇشىن قىرۋار اقشا ەمەس، ىقىلاسىڭ بولسا جەتكىلىكتى بولاتىنىنا كوز جەتكىزدىك.
جاسۇلان ناۋرىءزالى
