«Azııa halyqtarynyń ertegileri» ıklynan
(Mońǵol ertegisi)
Este joq erte zamanda shal men kempir ómir súripti. Jeti jasar uly bar eken, jandarynda. Baıaǵydan bergi jıǵan-tergen bar múlki: bir aıaqtan aqsaıtyn aq boz at, sińiri qatqan ap-aryq úsh qap-qara eshki men tozyǵy jetken, kónergen kıgiz úı. Shalekeń shattyq kórmeı, bıtin syǵyp, qanyn jalaǵan taqyr kedeı bolsa da, uly epti de zerek bop ósedi.
Bir kúni solardyń kıgiz úıine atqaminer túsedi. Bul – atyn estise aýyl-aımaq seskenetin arsyz da aıbarly adam edi. Ol ishke engende kıgiz ústine jaıǵasqan jetidegi bala úlken tostaǵanmen qymyz iship otyrady. Atqaminer balaǵa qarap kúlip jiberedi.
– Mynaýyń tostaǵan emes, naýa ǵoı!
Bala sýsyn ishýin doǵaryp, tańdanǵan kúıi beıtanystyń betine qaraıdy.
– Asa qurmetti myrza, osyndaı «naýadan» sý ishetin malyń az ba edi?
Mundaıdy kútpegen bıshikesh tosylyp qalady.
Tańerteń álgi ákimsymaq jolǵa shyǵaıyn dese tún aýa eshkiler atynyń tartpasyn shaınap tastapty. Ashý shaqyrǵan ol shalǵa bylaı deıdi:
– Shyǵyndy óte, onda ońdyrmaımyn!
Oıly ul ákesin jaqtap álek:
– Mártebeli meıman! Aıyldy shaınaǵan eshkiler, sondyqtan qunyn solarǵa tóletkin.
Bıshikesh únsiz ǵana jylqyǵa qarǵyp minip, shoqyraqtap shaba jóneledi. Attyń aıaǵy kórtyshqan inine kirip, er-toqym ushyp jerge túsedi. Ábden yza býǵan atqaminer jylqysyn qamshynyń astyna alady.
Muny kórgen bala kúle bastaıdy.
– Nemeneńe jetisip tursyń, aqymaq bala? – deıdi atqaminer.
– Kúlmeı qaıteıin? El ishinde: «Ótirikke qumar jannyń aty túbi kórtyshqan inine súrinip, ózi jerge qulaıdy» degen támsil bar. Demek, sen – ótirikshisiń, aldampazsyń, qýsyń, sumsyń!
Oryndy aıtylǵan sózge qarsy ýáj tappaǵan ákimsymaq jylqysyn jetektegen qalpy óz jaıymen ketedi.
Sóıtip, oıly ul uıatsyz atqaminerdi utymdy sheneıdi.
Foto ashyq derekkózden alyndy
Aýdarǵan: Qazaqstan Jazýshylar odaǵynyń
múshesi, jazýshy-dramatýrg,
ádebıettanýshy, synshy Álibek BAIBOL
Ertegi aýdarmashynyń ruqsatymen jarııalandy.
Avtorlyq quqyq saqtalǵandyqtan kóshirip basýǵa bolmaıdy!
