Jýyrda el Prezıdenti Q.Toqaev elimizdegi respýblıkalyq jáne jergilikti joldardyń jaǵdaıyna qatysty azamattardyń aıtyp júrgen synyna qatysty pikir bildirdi.
"Sapasyz jasalǵan jol jyl saıyn jóndeýdi qajet etedi jáne buǵan memlekettiń qarjysy tıimsiz jumsalyp jatyr. Úkimetke, ákimder men quqyq qorǵaý organdaryna jaǵdaıdy retteý úshin júıeli sharalar qabyldap, onyń esebin berýdi tapsyramyn», - degen bolatyn Prezıdent.
Memleket basshysynyń bul sózine oraıda joldyń sapasyn baqylaýdy úzdiksiz júrgizip otyrǵan «Jol aktıvteri ulttyq sapa ortalyǵy» RMK Almaty oblystyq fılıalynyń dırektory Jasulan Kerimqulov fılıal janynan qurylǵan «Jolsapa» qoǵamdyq baqylaý keńesiniń kezekti otyrysyn ótkizdi.
Karantındik jaǵdaıǵa baılanysty otyrysqa Almaty qalasynyń mańyndaǵy aýdandardan ǵana qoǵamdyq belsendiler qatysty. Qarasaı aýdandyq máslıhat depýtattary – Bekjan Sýnbekov, Aıjan Balajanova, Jambyl aýdandyq máslıhat depýtaty Aıdyn Júnisov jáne «Atameken» gazetiniń jýrnalısi Eldar Jaqypbekov, taǵy birqatar ardager jýrnalıster fılıaldyń atqaryp jatqan jumysymen tanysty.
Búgingi tańdaǵy joldardyń sapasy men ózekti máseleler tóńireginde fılıal basshysy Jasulan Mahambetuly tilge tıek etip, jol sapasyna úlken nuqsan keltiretin aýyr júk kólikteriniń qozǵalysyna toqtaldy. Sondaı-aq, qoǵamdaǵy keıbir buzaqylardyń óreskel áreketteriniń saldarynan jol belgileri jaramsyz bolyp nemese múlde joǵalyp ketetinine birneshe mysal keltirdi.
Atap aıtqanda, aýyl mańyndaǵy jol belgilerin túbimen qoparyp, urlap alyp, úıine qurylys materıaldaryna paıdalanǵan turǵyndar anyqtalǵan. Sondaı-aq, keıbir adamdardyń jol belgilerin maıystyryp, syndyryp, qulatyp ketken jaılar da kezdesedi. Mine, osy sııaqty tolyp jatqan kemshilikterdiń aldyn alý sharalaryna qoǵam belsendilerin, halyq qalaýlylaryn jáne buqaralyq aqparat quraldaryn atsalysýǵa shaqyrdy.
Otyrys barysynda depýtattar ózderin tolǵandyrǵan saýaldarǵa jaýap aldy. Jıyn sońynda jınalǵandar qoǵamdyq keńes múshelerimen birge ǵımarat ishin aralap, zerthana jumystarymen tanysty. Jıynǵa qatysýshylar jyljymaly zerthana avtokóliginiń joldy tekserý barysyndaǵy atqaratyn mańyzdy is-áreketinen naqty maǵlumat aldy.
