Kólik júrgizýshileri "QazAvtoJoldyń” jumysy sapasyz ekendigin aıtyp, premer-mınıstrge shaǵymdandy, dep habarlaıdy “Adyrna” ulttyq portaly Kolesa.kz saıtyna silteme jasap.
Bıylǵy qystyń sýyǵy men qalyń qardyń áserinen tas joldar durys tazalanbaǵan, saldarynan jol qozǵalysy qıyndaǵan. Osy sebepti kólik júrgizýshileri “QazAvtoJoldyń” jumysy sapasyz ekendigin aıtyp, premer-mınıstrge shaǵym túsirgen.
«Jolǵa qyzmet kórsetý deńgeıi óte tómen. Joldardy tazalamaıdy. Nashar jol bólikterine arnaıy tehnıka barmaıdy. Jol japqandy ǵana biledi. Sodan uzyn-sonar keptelis paıda bolady. Qar qursaýynda qalǵan tasymaldaýshylar aptalap jolda tur, bul júrgizýshiler ómirine qaýipti, ári janarmaı kóp ketedi, zat dittegen jerine keshigip jetedi. Onyń ústine jolda qalǵandar qajet ónimderdi óte qymbat satyp alady, mysaly, nan – 1000 teńge, sý – 1500 teńge», – delingen Halyqaralyq avtotasymaldaýshylar odaǵynyń (QazATO) músheleri premer-mınıstr men kólik mınıstrine joldaǵan úndeýinde.
Al "QazAvtoJoldyń" aıtýynsha, Jambyl oblysy Merki aýdanyndaǵy Qaınar jáne Aspara kentteri arasyndaǵy jolda aqaýlar paıda bolǵan. Atalǵan ýchaskede aǵymdaǵy jyldyń qańtar aıynan bastap jabyn men betonnyń qorǵanysh qabatynyń buzylýy, sondaı-aq boılyq jáne kóldeneń tigister boıynda shuńqyrlar paıda bolǵan. Munyń bári qardyń kóp túsýi men aýa temperatýrasynyń kúrt ózgerýine baılanysty. Jolshylar aýa-raıy rettelgende joldardy jóndeý jumystaryn bastaıtyndaryn aıtyp, ýáde berdi.
“Adyrna” ulttyq portaly
