«Atastyrý» degen sózdiń túpki maǵynasy baılaý degennen shyǵady. Jylqy baqqan, atqa mingen el bul sózdi jıi qoldanady. Atastyrý, ıaǵnı eki adamdy, eki rýdy, eki eldi bir-birine baılaý
Qazaq tirshiliginde atastyrý uly-qyzy bar eki azamattyń quda bolamyz degen aýyzsha ýádesi, rýly eldiń basshy aqsaqaldarynyń uıǵarymy arqyly bastalady da quda túsýmen tııanaqtalady. Quda túsýdiń birneshe túri bolady. Qazaq bala besiktegi kezinen bastap quda túse beredi (besik quda t.b.). Besik quda sırek kezdesedi.
Kóbinese, jigit er jetip qalǵan ýaqytta onyń ózi, ákesi men sheshesi, aǵasy men jeńgesi, jaqyn aǵaıyndary ózderine laıyq jerden qyz qaraı bastaıdy. Mundaıdy qazaq «teń-teńimen, tezek -qabymen» deıdi, ıaǵnı eki jaqtyń áleýmettik jaǵdaıy bir-birine sáıkes bolýy kerek. Qazaq halqy ejelgi zamannan beri úılenýge asa mańyz beredi jáne úı bolýdy jigit pen qyzdyń bir-birin ólip-óship jaqsy kórýi, eki aradaǵy mahabbat sezimi degen ýaqytsha qubylystarmen baılanystyrmaıdy. Qazaq úshin úılený asa mańyzdy áleýmettik qadam, úı bolý memleket qurý sııaqty asa jaýapty sharýa bolyp tabylady. Onyń erejeleri «qatyn alma-qaıyn al», «jigittiń jaqsy bolmaǵy- naǵashydan» sııaqty qaǵıdalarmen bekitilgen.
Quda túsý «qyz aıttyrýdan» bastalady, ıaǵnı unatqan, ózderimen syılas, qatarlas jáne boıjetken qyzy bar aýylǵa arnaıy «jaýshy» attanady. Ulyna jar tańdaǵan áke jaqsy nıetti bildirý úshin qalys adamdy «jaýshy» etip jiberedi. Jaýshy sózin: “Sizde lashyn bar, bizde suńqar bar”, - dep bastap, quda bolǵylary keletinin aıtady. Eger qyzdyń ata-anasy bul usynysty qabyl alsa, Qyz ákesi jaýshy arqyly kúıeý ákesiniń týystarynyń «quda túser» mezgilin aıtady.
Jaýshydan keıin quda túsý bolady, ol kezdesýge jigit jaǵynan birneshe syıly, týys adamdar baryp qalyń mal mólsherin, jasaý qunyn t.b. máselelerdi kelisedi. Bir eskertetin másele jasaý-jigit jaǵynan kelgen qalyńmal mólsherine shamalas, keıde onan da asyp túsedi. Sebebi onyń quramyna- otaý úı, jıhazy, kıim-keshek t.b. kiredi.
Qudalyqqa jiberilgen adamdarǵa «qarǵybaý» kádesin tartady, qudalyqty bekiter kádesin-at pen shapan beredi. Quda túsip, quıryq-baýyr jeskennen keıin ǵana qudalyq ýaǵda bekıdi. Eń baǵaly syı kúıeýdi ákesine nemese onyń ornyndaǵy adamǵa tartylady. Ýádeniń belgisi retinde qonaqtardyń aldyna jińishke etilip kesilgen quıryq pen baýyr qoıylady. «Quıryq-baýyr” eń aldymen jigit týystaryna, sonan soń qyz týystaryna beriledi. Quda túsý toıynda qutty bolsyn aıtyp kelgen áıelder qudalarǵa arnap shashý shashady.
Endi atastyrýdyń ınstıtýıonaldy, ıaǵnı zańdastyrylǵan qubylys ekenin dáleldeý úshin birneshe ádet-ǵuryp erejelerine kóńil bóleıik:
1. Eger «qarǵybaýy» berilip, sóz salyp qoıǵan jigit jaǵy kelisimdi buzyp, basqa bireýdiń qyzyna quda túspek bolsa, onda kelisimdi buzǵan kináli jaq at-ton aıyp tóleıdi jáne búkil kıitti qaıtarady.
2. Eger aldynda qudalasyp, keıin basqa bireýge úılenbekshi bolyp, kelisimdi buzsa, onda kelisimdi buzǵan jaq bir túıe bastatqan toǵyz aıypty tóleıdi. Birinshi, quda túsken qalyńdyqty alyp, báıbishe atandyryp baryp qana ekinshisine úılenýge haqy bar.
3. Qalyńmaldyń negizgi bóligi nemese barlyǵy ótelgen soń ǵana kúıeý jigit qalyndyq oınaýǵa barady («uryn barý»). Kúıeý jigittiń bul kelýi birinshi kelý bolǵandyqtan, qalyńdyq jaǵynan jeńgeleri toı (bastańǵy túrinde) jasaıdy.
4. Eger kúıeý qalyńmalyn ótemeı, uryn barmaı, qalyndyq aýlyna kele qalsa, onda onyń atyn tartyp alyp, isin ádepsizdikke jatqyzyp, ózin jaıaý jiberedi.
5. Eger uryn barǵanda qalyndyq aýlynda bolǵysy kelse, kúıeý shatyr tigip bir apta, tipti bir aı jatýǵa erki bar. Uryn toıdan keıin kúıeýdiń qalyndyq oınap baryp turýyna haqy bar.
6. Kúıeý jigit qalyndyqtyń uzatylý toıyna deıin jaqyndyqqa barýǵa haqy joq.
7. Eger kúıeý uryn toıda qalyńdyǵyn páktiginen aıyrǵan bolsa, neke jaýlyq tósegen jeńgelerge kádesin beredi.
8. Uryn toıǵa kelip ketken kúıeý qaıtys bolsa, onda týystary qalyńdyqty marqumnyń aýlyna qaıǵyly kúıde aza kádesimen birge ákeledi. Osyndaı qalyndyq /jesir/ kúıeýin jyl boıy joqtap, sonan soń onyń inisine nemese aǵasyna, tipti bolmasa jaqyn týysyna turmysqa shyǵady.
9. Neke qııýdy qalyńdyq aýylynda molda ótkizedi.Ol jigit pen qyz jaǵynan káde alyp /altyn júzik, saqına, sadaq jebesi/ ony sý quıylǵan syrly tostaǵanǵa salady. Jigit pen qalyndyq, olardyń týystary neke qııar sýdy ishýi jubaılyq ómirdiń basy bolyp sanalady.
10. Neke qııardyń ornyna jigittiń úlken shańyraǵynda otqa maı quıý, alqyp janǵan otqa úsh ret tájim etý (basyn jerge tıgizip) saltanaty júredi.
11. Otqa «maı ana, ot ana jarylqa» dep sóılep tájim jasaıdy, úlken áıelder ottyń jalynyna alaqandaryn tosyp kelinniń betin sıpaıdy. Osydan keıin kelindi jumsaq ılengen teriniń ústine otyrǵyzady.
12. Kelin úlken úıge birinshi ret enerde «úı aınaldyrý» degen bolady. Qaıyn enesi tiri turǵanda kelin tórge shyqpaıdy. Qaıyn enesi qaıtys bolǵanda kelin otqa taǵy da maı quıady, odan ári tórge shyǵýǵa ruqsat etiledi.
Jambyl ARTYQBAEV, Tarıhshy-etnograf
"history.kz"
