Almaty oblysy, Kegen aýdanyna qarasty, Shyrǵanaq aýylynyń jańa ákimi aýyl turǵyndarynyń kelisiminsiz aýysyp, halyq narazylyǵyn týdyrýda, dep habarlaıdy "Adyrna" tilshisi. Bul týraly ánshi Ramazan Stamǵazıev óz Instagram paraqshasynda málim etti.
Ramazan Stamǵazıevtiń sózinshe, 20 mınýtta aýysqan jańa ákim saılanar aldynda aýyl turǵyndarymen esh sanaspastan burynǵy ákim Bekbatyrov Orazbaıdy ákimdikten túsirip tastaǵan. Ol Instagram paraqshasyndaǵy jazbasynda:
"20 mınýtta aýyl ákimi aýysty nege?
Biz, sol aýyldan túlep ushqan azamattar, Almaty oblysy, Kegen aýdany, Shyrǵanaq aýyldyq okrýginiń buryńǵy ákimi Orazbaı Bekbatyrovtyń aýylǵa sińirgen eńbegine kóz jumyp qaraı almaǵandyqtan osy postty jazýǵa týra keldi.
Orazbaı Bekbatyrov Shyrǵanaq aýylynyń órkendeýi úshin tek aýyl turǵyndary ǵana emes, sol aýyldan neshe jyl buryn ketip qalǵan bizdiń de basymyzdy qosyp, sol aýyldyń órkendeýine, zamanaýı talaptarǵa saı bolýyna úles qosýymyzǵa muryndyq boldy. Bul kez-kelgen ákimniń oıyna kele bermeıtin nárse.
Aýyldaǵy fýtbol alańy, ardagerler eskertkishi, jaramsyz qalǵan úıdi paıdalana otyryp jasaǵan jabyq sport kesheni, aýyldyń toqsan jyldyq mereıtoıy men qatar kitap shyǵaryp,esh úkimettiń qarjysysyz, sponsorlar jınaýynyń nátejıesinde ótkizilgen. Bári-bári sol Orazbaı aǵamyzdyń erekshe uıymdastyrýshylyq qabileti men aýylǵa degen mahabbatynyń birden bir kýási. Oǵan tek aýyl turǵyndary ǵana emes, syrttaǵy biz, aýdan jáne oblys ákimderi de kýá.
Endeshe nege sizder, Almaty oblys ákimi,aýdan ákimi,aýyl turǵyndary, aýylymyzdan shyqqan, aýyl úshin kúıetin aýyl azamatyn qoldamaı otyrsyzdar? Sizder saılaǵan maslıhat depýtattary men Kegen aýdany ákiminiń apparaty halyq múddesin emes, tek belgili bir adamdardyń múddesin qorǵap ketkenin kórip otyrmyz!Endeshe aýyl azamatyn qoldaıyq!
Meniń oıymsha aýyl belsendileri, janashyrlary birigip quqyqtyq memlekette turyp jatqanymyzdy eskere otyryp, quzyrly organdarǵa úndeý tastap, Orazbaı Bekbatyrovty Shyrǵanaq aýyldyq okrýginiń ákimi etip qaıta saılaý usynysyn tastaımyz" dep jazdy.
Aýyl turǵyndary, QR Prezıdentiniń 09.04.2014 jylǵy, nómiri 792 buıryǵynyń, 13-pýnktine qarsy kelgen aýdan ákimi Baıedılov Talǵat Eskendirulynyń sheshimine óz shaǵymdary men narazylyǵyn aıtýda. Onda "aýyl ákimin, aýdan ákimi jergilikti uıymmen birlesip saılaýy qajet", delingen.
"Adyrna" ulttyq portaly
