Şymkent qalasyndaǧy «Qajymūqan» atyndaǧy ortalyq stadion aumaǧynda kezektı senbılık azyq-tülık järmeŋkesı öttı. Apta saiyn ūiymdastyrylatyn şaranyŋ basty maqsaty – qala tūrǧyndaryn sapaly ärı qoljetımdı önımmen qamtamasyz etu jäne jergılıktı käsıpkerler men şarua qojalyqtaryn qoldau.
Taŋǧy uaqyttan bastap järmeŋke alaŋyna tūrǧyndar köptep jinaldy. Mūnda Şymkenttıŋ jergılıktı öndıruşılerımen qatar körşıles oblystardan kelgen şarualar da öz önımderın ūsyndy. Satyp aluşylar kökönıs pen jemıs-jidek, jaŋa soiylǧan et, süt önımderı, ūn jäne nan önımderı, sondai-aq türlı konditerlık jäne toqyma būiymdaryn naryqtaǧy baǧadan tömen baǧada satyp aldy.
Järmeŋkenıŋ basty erekşelıgı – önımderdıŋ tıkelei öndıruşılerden jetkızıluı.
Şymkent qalasy auyl şaruaşylyǧy jäne veterinariia basqarmasynyŋ «Azyq-tülık qauıpsızdıgın qamtamasyz etu» bölımınıŋ basşysy Jandos Hanievtıŋ aituynşa, järmeŋke barysynda barlyq sanitarlyq talaptar qataŋ saqtalady.
– Käsıpkerlerge sauda oryndary tegın berıledı. Järmeŋkenıŋ qauıpsız ötuın qamtamasyz etu üşın polisiia qyzmetkerlerı men sanitariialyq-epidemiologiialyq baqylau mamandary qatysady. Sonymen qatar köşpelı zerthana jūmys ıstep, satylyp jatqan önımderdıŋ sapasyn tekserıp otyrady, – dedı ol.
Järmeŋkege tūraqty qatysatyn käsıpkerlerdıŋ bırı – et önımderın satuşy Koşgar Abdualy. Onyŋ aituynşa, ol apta saiyn şamamen 100 kelı et önımın äkelıp, tügelge juyq satyp ketedı.
Al järmeŋkenıŋ tūraqty keluşılerınıŋ bırı Jūmakül Mahanova būl jerge tek sauda jasau üşın emes, adamdarmen aralasyp, qoǧamǧa paidasyn tigızu üşın keletının aitady. Qoǧamdyq jūmystarǧa belsendı qatysatyn ol keide mūqtaj jandarǧa önımderdı tegın berıp, qaiyrymdylyqpen de ainalysady.
Jalpy senbılık järmeŋke tek sauda alaŋy ǧana emes, tūrǧyndar men käsıpkerlerdıŋ kezdesıp, pıkır almasatyn ortasyna ainalyp otyr. Aita keteiık, mūndai järmeŋkeler Şymkent qalasynyŋ bes audanynda ūiymdastyryluda.
